គោរមងារ «លោកអ្នកឧកញ៉ា» ជាគោរមងារឧកញ៉ាខ្ពស់ជាងគេបំផុតនៅកម្ពុជា បន្ទាប់ពីអ្នកឧកញ៉ា និងឧកញ៉ា។ គោរមងារឧកញ៉ា សំដៅដល់ងារកិត្តិយស ដែលព្រះមហាក្សត្រទ្រង់ព្រះរាជទានដោយព្រះរាជក្រឹត្យទៅតាមលំដាប់ថ្នាក់ ដល់រូបវន្តបុគ្គលជាប្រជាពលរដ្ឋខ្មែរ ដែលមានគុណបំណាច់ក្នុងការចូលរួមអភិវឌ្ឍនិងកសាងជាតិ។
តាមទិន្នន័យដែល Oknha News ទទួលបាន គិតត្រឹមដើមខែឧសភា ឆ្នាំ២០២៦នេះ នៅកម្ពុជាបច្ចុប្បន្នមាន «លោកអ្នកឧកញ៉ា» ចំនួន ៩រូប ខណៈដែល អ្នកឧកញ៉ា ជឹង សុភាព ជាអ្នកជំនួញជើងចាស់មួយរូប ដែលទទួលបានគោរមងារខ្ពស់បំផុតនេះចុងក្រោយគេ។
អ្នកឧកញ៉ា ជឹង សុភាព ហៅ «យាយភូ» ត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ផ្តល់គោរមងារ «លោកអ្នកឧកញ៉ា» នៅថ្ងៃទី១២ ខែកក្កដា ឆ្នាំ២០២៥។
សូមជម្រាបថា លោកអ្នកឧកញ៉ា ជឹង សុភាព ត្រូវជាភរិយារបស់ អ្នកឧកញ៉ា ឡាវ ម៉េងឃីន និងត្រូវជាម្តាយរបស់ លោកជំទាវអ្នកឧកញ៉ា ជឹង សុគន្ធាវី អគ្គនាយិកានៃក្រុមហ៊ុន ទឹកពិសាវីតាល់ និងផលិតផលមីជាតិ៕
