ByteDance ដែលជាក្រុមហ៊ុនបច្ចេកវិទ្យាខ្នាតយក្សចិន និងជាអ្នកបង្កើត TikTok កំពុងស្វែងរកប្រាក់កម្ចីរហូតដល់ ២០ពាន់លានដុល្លារ ពីធនាគារនានានៅក្រៅប្រទេស ក្នុងគោលបំណងពង្រីកហេដ្ឋារចនាសម្ព័ន្ធ AI របស់ខ្លួនបន្ថែមទៀត។ នេះបើតាមការចុះផ្សាយពីសារព័ត៌មាន Bloomberg។
ជុំវិញកិច្ចខិតខំប្រឹងប្រែងផ្នែកហិរញ្ញប្បទាននេះ ត្រូវបានកើតឡើង ខណៈដែល ByteDance កំពុងព្យាយាមបង្កើនការចំណាយលើហេដ្ឋារចនាសម្ព័ន្ធបញ្ញាសិប្បនិម្មិត AI និងស្វែងរកការពង្រឹងជំហររបស់ខ្លួននៅក្នុងទីផ្សារ AI សកលដែលមានការប្រកួតប្រជែងកាន់តែខ្លាំងឡើង។
យ៉ាងណាមិញប្រភពពី Bloomberg បានរាយការណ៍ទៀតថា ក្រុមហ៊ុន ByteDance បានទាក់ទងក្រុមធនាគារអន្តរជាតិមួយចំនួន ទាក់ទងនឹងប្រាក់កម្ចីដែលមានសក្តានុពល។ កញ្ចប់ហិរញ្ញប្បទាននេះអាចលើសពីកំណត់ត្រាមុនសម្រាប់ការខ្ចីប្រាក់នៅក្រៅប្រទេសដោយក្រុមហ៊ុនចិន ហើយវាអាចនឹងជាប់ចំណាត់ថ្នាក់ក្នុងចំណោមកិច្ចព្រមព្រៀងប្រាក់កម្ចីសាជីវកម្មធំបំផុតនៅទូទាំងពិភពលោក ផងដែរ។
គួរជម្រាបជូនផងដែរថា ByteDance បានក្លាយជាអ្នកអភិវឌ្ឍបញ្ញាសិប្បនិម្មិតឈានមុខគេមួយរបស់ប្រទេសចិន ដោយវិនិយោគយ៉ាងច្រើនលើគំរូ AI សមត្ថភាព Cloud Computing និងការសាងសង់មជ្ឈមណ្ឌលទិន្នន័យថែមទៀតផង៕
