ប្រធានាធិបតីអាមេរិក លោក ដូណាល់ ត្រាំ បានព្រមានអំពីការវាយប្រហារកាន់តែខ្លាំងឡើងលើអ៊ីរ៉ង់ប្រសិនបើមិនមានកិច្ចព្រមព្រៀងណាមួយងត្រូវបានសម្រេចទេនោះ ខណៈគោលដៅវាយប្រហារទ្រង់ទ្រាយធំអាចនឹងជារោងចក្រថាមពល នៅសប្តាហ៍ក្រោយ។ នេះបើតាមការចុះផ្សាយពីសារព័ត៌មាន AFP។
លោក ត្រាំ បាននិយាយនៅថ្ងៃទី១៤ ខែកក្កដា ក្នុងបទសម្ភាសមួយជាមួយ Fox News ថា៖” យើងនឹងវាយប្រហារពួកគេយ៉ាងខ្លាំងក្លាបំផុតអាចនៅយប់នេះ យប់ស្អែក ឬយប់ថ្ងៃបន្ទាប់។ ហើយបើឈានដល់សប្តាហ៍ក្រោយ នោះវានឹងអាចកាន់តែអាក្រក់សម្រាប់ពួកគេ ពីព្រោះគោលដៅនឹងជារោងចក្រថាមពល និងស្ពានរបស់ពួកគេ។ យើងនឹងកម្ទេចវាចោលទាំងអស់ ប្រសិនបើពួកគេមិនចូលតុចរចា”។
មិនតែប៉ុណ្ណោះ ប្រធានាធិបតីអាមេរិករូបនេះ ក៏បានព្រមានអ៊ីរ៉ង់ទៀតថា ពួកគេគ្មានជម្រើសអ្វីផ្សេងទៀត ក្រៅពីឈានដល់កិច្ចព្រមព្រៀងជាមួយទីក្រុងវ៉ាស៊ីនឲ្យបានឆាប់រហ័សនោះឡើយ។ បច្ចុប្បន្នសហរដ្ឋអាមេរិក នៅតែមានការប្រុងប្រយ័ត្នខ្ពស់ចំពោះទីតាំងជនស៊ីវិល ប៉ុន្តែនៅចុងបញ្ចប់អ្វីៗគ្រប់យ៉ាងនឹងត្រូវកម្ទេចគ្មានសល់ ប្រសិនបើទីក្រុងតេអេរ៉ង់ បន្តបដិសេធមិនចរចា។
គួរជម្រាបជូនផងដែរថា ទីក្រុងវ៉ាស៊ីនតោន និងទីក្រុងតេអេរ៉ង់នៅតែបន្តទាក់ទងគ្នាជុំវិញការស្វែងរកដំណោះស្រាយនិងកិច្ចព្រមព្រៀង ប៉ុន្តែរដ្ឋបាលសហរដ្ឋអាមេរិកបានទទូចថា ខ្លួនមិនអាចជំរុញការចរចាឲ្យបានលឿននោះបានទេ ខណៈពេលដែលអ៊ីរ៉ង់នៅតែបន្តរឹតបន្តឹងសកម្មភាពផ្លូវសមុទ្រតាមរយៈច្រកសមុទ្រ Hormuz ដដែលនោះ៕
