នៅថ្ងៃទី៧ ខែសីហា ឆ្នាំ២០២៦នេះ លោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន និងលោក សុខ លូ អភិបាលខេត្តបាត់ដំបងបានដឹកនាំតំណាងក្រុមហ៊ុនអន្តរជាតិចំនួន១៥ក្រុមហ៊ុន ចុះពិនិត្យទីតាំងផ្លូវក្នុងក្រុងបាត់ដំបងចំនួន២១ខ្សែ ដើម្បីត្រៀមរៀបចំការដេញថ្លៃសាងសង់ក្នុងពេលឆាប់ៗខាងមុខនេះ។
តាមគម្រោង ការបើកកញ្ចប់ឯកសារដេញថ្លៃផ្លូវទាំង២១ខ្សែនេះ នឹងត្រូវធ្វើឡើងនៅថ្ងៃទី២៨ ខែសីហា ឆ្នាំ២០២៦។ បន្ទាប់ពីនីតិវិធីដេញថ្លៃត្រូវបានបញ្ចប់ ការសាងសង់ផ្លូវនឹងអាចចាប់ផ្ដើមនៅអំឡុងខែកញ្ញា ឆ្នាំ២០២៦។ ការបញ្ចប់គម្រោងនេះ នឹងធ្វើឱ្យក្រុងបាត់ដំបងកាន់តែមានសោភ័ណភាព ទាក់ទាញភ្ញៀវទេសចរជាតិ និងអន្តរជាតិ ក៏ដូចជាបង្កលក្ខណៈងាយស្រួលដល់ការរស់នៅ និងការធ្វើដំណើររបស់ប្រជាពលរដ្ឋ។
គួរបញ្ជាក់ថា ក្រុងបាត់ដំបងបានទទួលគម្រោងធំៗចំនួន៣ ដែលជាថវិកាហិរញ្ញប្បទានរបស់ធនាគារអភិវឌ្ឍន៍អាស៊ី (ADB) និងអនុវត្តដោយក្រសួងសាធារណការ និងដឹកជញ្ជូន។ គម្រោងទាំងនោះរួមមាន៖ ទីលានចាក់សំរាមស្តង់ដារនៅឃុំតាគ្រាម ស្រុកបាណន់ ដែលជាទីលានធំជាងគេមួយនៅកម្ពុជា, ប្រព័ន្ធរំដោះទឹកកខ្វក់នៅប៉ែកខាងកើតស្ទឹងសង្កែ និងប្រព័ន្ធរំដោះទឹកកខ្វក់នៅប៉ែកខាងលិចស្ទឹងសង្កែ៕
