ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងទីប្រឹក្សានៃស្ថានទូតសាធារណរដ្ឋប្រជាមានិតចិន ប្រចាំកម្ពុជា ព្រមទាំងភាគីពាក់ព័ន្ធ បានបើកសិក្ខាសាលា ដើម្បីរួមគ្នាវិស័យកម្មន្តសាលឆ្លាតវៃ សេដ្ឋកិច្ចឌីជីថល និងរដ្ឋាភិបាលឌីជីថលនៅកម្ពុជាឱ្យកាន់តែប្រសើរឡើង។
សិក្ខាសាលារវាងកម្ពុជា និងចិន នាពេលនេះ បានធ្វើឡើងកាលថ្ងៃទី៩ ខែកញ្ញា ឆ្នាំ២០២៦ ក្រោមវត្តមាន លោក គង់ វិមាន អគ្គលេខាធិការនៃអគ្គលេខាធិការដ្ឋាននៃក្រុមប្រឹក្សាអភិវឌ្ឍន៍កម្ពុជា (ក.អ.ក.) និងលោកស្រី Guan Wei ទីប្រឹក្សានៃស្ថានទូតសាធារណរដ្ឋប្រជាមានិតចិន ប្រចាំកម្ពុជា ថ្នាក់ដឹកនាំនិងមន្រ្តីតំណាងស្ថានទូត សាស្ត្រាចារ្យមហាវិទ្យាល័យវិជ្ជាជីវៈធុរកិច្ចអន្តរជាតិហ៊ូណាន និងមហាវិទ្យាល័យវិជ្ជាជីវៈការងារនិងធនធានមនុស្សហ៊ូណាន ព្រមទាំងថ្នាក់ដឹកនាំនិងមន្ត្រីមកពីក្រសួង ស្ថាប័នពាក់ព័ន្ធចំនួន ៩។
ក្នុងឱកាសនេះ លោកអគ្គលេខាធិការ បានគូសបញ្ជាក់ពីចំណងមិត្តភាពដែកថែបដ៏រឹងមាំរវាងចិននិងកម្ពុជា ដែលត្រូវបានកសាង ជំរុញ និងថែរក្សាយ៉ាងយកចិត្តទុកដាក់ដោយរដ្ឋាភិបាលនិងប្រជាពលរដ្ឋនៃប្រទេសទាំងពីរ។ លោកក៏បានលើកឡើងអំពីសារៈសំខាន់នៃការអភិវឌ្ឍធនធានមនុស្ស ការពង្រឹងសមត្ថភាពស្ថាប័ន និងការធ្វើបរិវត្តកម្មឌីជីថល ដើម្បីគាំទ្រដល់ការអនុវត្តគោលនយោបាយ និងទិសដៅអភិវឌ្ឍន៍របស់រាជរដ្ឋាភិបាល។
ជាមួយគ្នានេះ លោកអគ្គលេខាធិការ ក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលសាធារណរដ្ឋប្រជាមានិតចិន និងភាគីពាក់ព័ន្ធទាំងអស់ដែលបានសហការរៀបចំសិក្ខាសាលានេះ និងសង្ឃឹមថាសិក្ខាកាមនឹងទទួលបានចំណេះដឹង និងបទពិសោធថ្មីៗ ដើម្បីយកទៅអនុវត្តក្នុងការងារឱ្យកាន់តែមានប្រសិទ្ធភាព។
សូមជម្រាបដែរថា សិក្ខាសាលានេះ រៀបចំឡើង ក្នុងគោលបំណងចែករំលែកបទពិសោធរបស់ចិនលើការធ្វើបរិវត្តកម្មឌីជីថល ដោយផ្តោតលើកម្មន្តសាលឆ្លាតវៃ សេដ្ឋកិច្ចឌីជីថល និងរដ្ឋាភិបាលឌីជីថល។ សិក្ខាសាលានេះនឹងប្រព្រឹត្តទៅរយៈពេល១៤ថ្ងៃ ចាប់ពីថ្ងៃទី៩-២២ ខែកញ្ញា ឆ្នាំ២០២៦ ដោយមានការធ្វើបទបង្ហាញពីសាស្ត្រាចារ្យនៃមហាវិទ្យាល័យវិជ្ជាជីវៈធុរកិច្ចអន្តរជាតិហ៊ូណាន និងមហាវិទ្យាល័យវិជ្ជាជីវៈការងារនិងធនធានមនុស្សហ៊ូណាន៕អត្ថបទ៖ហ្សាលីន
