(រាជធានីភ្នំពេញ)៖ នាថ្ងៃទី២៦ ខែតុលា ឆ្នាំ២០២៦ អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា និងលោក Ye wei ប្រធានប្រធានប្ដូវេនប្រចាំខែវិច្ឆិកា បានអញ្ជើញជួបសម្ដែងការគួរសម និងពិភាក្សាការងារជាមួយ គណប្រតិភូជាង ១០ក្រុមហ៊ុន មកពីទីក្រុងឃុនមីង សាធារណរដ្ឋប្រជាមានិតចិន។
ក្នុងជំនួបជាមួយបណ្ដាអ្នកវិនិយោគិន ក្រុមហ៊ុន និងសហគ្រាសនេះ អ្នកឧកញ៉ា លី ឃុនថៃ បានលើកឡើងនូវសក្តានុពលថ្មីៗនៅកម្ពុជា ដោយរួមមានទាំង ឧស្សាហកម្ម កសិកម្ម និងទេសចរណ៍។ ក្នុងឱកាសនេះ អ្នកឧកញ៉ាក៏ប្រកាសស្វាគមន៍យ៉ាងកក់ក្ដៅចំពោះអ្នកវិនិយោគចិន ដែលមកស្វែងរកឱកាសវិនិយោគនៅកម្ពុជា និងប្ដេជ្ញាជំរុញបន្ថែមទៀតឲ្យវិនិយោគិនចិន ពិនិត្យលទ្ធភាពមកបណ្ដាក់ទុននៅប្រទេសកម្ពុជា។
អ្នកឧកញ៉ាក៏បានណែនាំដល់អ្នកវិនិយោគចិន អំពីតំបន់ទេសចណ៍នានានៅកម្ពុជា ពិសេសប្រាសាទអង្គរវត្តនៅខេត្តសៀមរាម និងតំបន់ឆ្នេរដ៏ស្រស់ស្អាតនៅខេត្តព្រះសីហនុផងដែរ។
សូមជម្រាបថា អ្នកវិនិយោគចិន ដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា ដោយប្រទេសចិនគឺជាដៃគូពាណិជ្ជកម្ម និងជាប្រភពទុនវិនិយោគបរទេសដ៏ធំរបស់កម្ពុជា។ ជាក់ស្តែង ក្នុងឆ្នាំ២០២៥ ទំហំពាណិជ្ជកម្មទ្វេភាគីកម្ពុជា-ចិន បានកើនឡើងដល់ប្រមាណ ២២,២៨ ពាន់លានដុល្លារ ដែលកើនឡើង ២៥% ធៀបនឹងឆ្នាំមុន៕
