សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសឱ្យដឹងថា សម្រាប់កិច្ចប្រជុំកំពូលអាស៊ាន នៅចុងឆ្នាំ២០២២ ដែលកម្ពុជាធ្វើជាម្ចាស់ផ្ទះ គឺនឹងរៀបចំឡើងនៅសណ្ឋាគារ សុខា ភ្នំពេញ របស់អ្នកឧកញ៉ា សុខ គង់ ហើយអំឡុងពេលកិច្ចប្រជុំជាច្រើននោះ សម្តេចក៏ស្នាក់នៅក្នុងសណ្ឋាគារនេះផងដែរ។
សម្តេចតេជោ បានថ្លែងក្នុងពិធីបើកសន្និសីទ «ចក្ខុវិស័យប្រទេសកម្ពុជាឆ្នាំ២០២២» ពិភាក្សាពីការស្តារកម្ពុជាក្រោយវិបត្តិជំងឺកូវីដ១៩ នាព្រឹកថ្ងៃទី០៦ ខែតុលា ឆ្នាំ២០២២ ថា៖ “ចូលដល់ខែវិច្ឆិកា គឺយើងធ្ងន់ធ្ងរបន្តិចចំពោះការងារ ព្រោះមិត្តភ័ក្តិរបស់យើង នឹងអញ្ជើញមកទីក្រុងភ្នំពេញ ដើម្បីចូលរួមប្រជុំ ហើយខ្ញុំសូមជម្រាបថា ម្តងនេះយើងយកសណ្ឋាគារនេះ (សណ្ឋាគារ សុខា) ធ្វើជាកន្លែងប្រជុំកំពូលអាស៊ានតែម្តង។ សណ្ឋាគារនេះ មានបន្ទប់ទៅដល់ជាង ៧០០បន្ទប់ ហើយខ្ញុំក៏នឹងមកស្នាក់នៅក្នុងសណ្ឋាគារនេះដែរ កុំឱ្យពិបាកទៅពិបាកមក”។
សណ្ឋាគារសុខាភ្នំពេញ បានបុកគ្រឹះសាងសង់ដំបូងនៅថ្ងៃទី៨ ខែសីហា ឆ្នាំ២០០៨ និងចំណាយថវិកាអស់ប្រមាណ ១២០លានដុល្លារ ដោយមិនគិតតម្លៃដី។ សណ្ឋាគារនេះ មានកម្ពស់ ១៨ ជាន់ មានទីតាំងនៅទល់មុខព្រះបរមរាជវាំង ស្ថិតនៅចំចំណុចប្រសព្វនៃទន្លេចតុមុខ។ សណ្ឋាគារនេះចំណាយពេលសាងសង់ជាង ៦ឆ្នាំ និងបានបើកសម្ពោធដាក់ឱ្យដំណើរការកាលពីថ្ងៃទី ២៣ ខែមីនា ឆ្នាំ២០១៥ ក្រោយអធិបតីភាពសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
ការសាងសង់ត្រូវបានធ្វើឡើងនៅលើផ្ទៃដីទំហំ៥ហិកតា និងមានកម្ពស់សរុប ៧២,៨៧ ម៉ែត្រ។ សណ្ឋាគារសុខា មានបន្ទប់ស្នាក់នៅសរុប ៧៤៤ បន្ទប់ ត្រូវបានចែកចេញជាពីរផ្នែកគឺបន្ទប់សណ្ឋាគារ ៥៤៩ បន្ទប់ និងខុនដូ ១៩៥ បន្ទប់។ សណ្ឋាគារមានសាលប្រជុំធំមួយ ដែលអាចផ្ទុកមនុស្ស៣០០០ នាក់ និងមានកន្លែងចតយានយន្ត ៣ ជាន់ ដែលអាចផ្តល់ជាចំណតរថយន្តប្រមាណ ១ ០០០ គ្រឿង ម៉ូតូ ១ ០០០ គ្រឿងនិងចំណតឧទ្ធម្ភាគចក្រ ២ កន្លែងនៅលើដំបូលអគារ។
កម្ពុជា ក្នុងនាមជាប្រធានអាស៊ាន ឆ្នាំ២០២២ នឹងធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ានលើកទី៤០ និង ៤១ និងកិច្ចប្រជុំកំពូលពាក់ព័ន្ធ (40th & 41st ASEAN Summits and Related Summit) ចាប់ពីថ្ងៃទី១០-១៣ ខែ វិច្ឆិកា ឆ្នាំ២០២២ ខាងមុខនេះ នៅរាជធានីភ្នំពេញ។ នេះបើតាមឯកឧត្តម លុយ ដាវីត រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាប្រធានលេខាធិការដ្ឋានគណៈកម្មការជាតិ រៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។ មកដល់ពេលនេះ កម្ពុជានិងប្រទេស ដែលត្រូវចូលរួមកិច្ចប្រជុំកំពូលនេះ បានពិភាក្សាគ្នាបណ្តើរៗហើយ ពីការត្រៀមខ្លួនទទួលថ្នាក់ដឹកនាំជាន់ខ្ពស់នៃប្រទេស ដែលត្រូវចូលរួមប្រជុំក្របខណ្ឌអាស៊ាន។
គួររំលឹកថា កម្ពុជាបានក្លាយជាសមាជិកអាស៊ាន កាលពីខែមេសា ឆ្នាំ១៩៩៩ ហើយបានធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ាន កាលពីឆ្នាំ២០០២ និង ២០១២ ដែលបានធ្វើឡើងនៅវិមានសន្តិភាព ហើយសម្រាប់ឆ្នាំ២០២២នេះ កម្ពុជានឹងរៀបចំកិច្ចប្រជុំដ៏ធំនេះដែរ ក្រោមប្រធានបទ «ASEAN A.C.T: ដោះស្រាយបញ្ហាប្រឈមរួមគ្នា»៕
