សិប្បកម្មដូងតាកែវ ក្រៅពីមានការគាំទ្រទាក់ទាញពីអតិថិជនខ្មែរ ផលិតផលដែលកែច្នៃដោយសិប្បកម្មជនពិការបានទទួលការគាំទ្រពីតារាដ៏ល្បីរបស់អាមេរិកផងដែរ ។
លោក មាគ ស៊ន ប្រធានមណ្ឌលសិប្បកម្មដូងតាកែវ បានប្រាប់ឧកញ៉ាញូស៍ថា កាលពីអំឡុងខែ កុម្ភៈ ឆ្នាំទៅ តារាហូលីវូដ អែនជេលីណា ជូលី មកស្រុកខ្មែរបានជាវកម្រាលជូតជើងពីខាងសិប្បកម្មរបស់លោក។ នេះបង្ហាញពីភាពប្រណិត និងលក្ខណៈធម្មជាតិដែលយើងបានកែច្នៃផលិតផលដ៏ល្អពិសេស រហូតដល់មានការចាប់អារម្មណ៍ពីតារាសម្តែងកម្រិតថ្នាក់ពិភពលោកទិញយកទៅប្រើប្រាស់។
សិប្បកម្មលោក មាគ ស៊ន មានទីតាំងស្ថិតនៅស្រុក ត្រាំកក់ ខេត្ត តាកែវ បច្ចុប្បន្នមានបុគ្គលិកបម្រើការងារជាង ៣៨ នាក់ ភាគជ្រើនជាជនពិការភាព ស្រ្តីមេម៉ាយ អ្នកមានផ្ទុកមេរោគ និង គ្រួសារងាយរងគ្រោះ។
ក្នុងសិប្បកម្មក្រៅពីកែច្នៃដូង ជាស្បែកជើង កម្រាលជូតជើង ក៏មានការច្នៃទ្រនាប់ចាន ទ្រនាប់កែវ កម្រាលព្រំ ហើយក៏ការកាត់ដេរឯកសណ្ឋានសិស្ស តម្បាញ កែច្នៃដើមចេកជាក្រមា ជាដើម។
លោក មាគ ស៊ន ឲ្យដឹងថា ការកែច្នៃស្រកីដូងទៅកិនបានទាំងស្រកីដូងម៉ត់ផង បានទាំងសរសៃផង។ ស្រកីដូងម៉ត់អាចយកទៅលាយជាមួយជី ផ្សាំដំណាំ។ ចំណែកឯសរសៃយកមករៀបចំធ្វើជា ស្បែកជើង កម្រាលជូតជើងជាដើម។
ការកែច្នៃស្បែកជើងពីស្រកីដូង ហើយដើម្បីបានស្បែកជើងក្នុងមួយគូត្រូវចំណាយពេលនិងពលកម្មច្រើន រហូតទៅដល់ ៥ ដំណាក់កាល ដោយក្នុងមួយថ្ងៃផលិតបានត្រឹមតែ ៥ ទៅ ៨ គូប៉ុណ្ណោះ លក់ក្នុងតម្លៃ ១០ ដុល្លារ ទៅ ១២ ដុល្លារ ក្នុងមួយគូ។ ទោះបីជាមានតម្លៃរាងថ្លៃបន្តិចបើប្រៀបធៀបជាមួយស្បែកជើងជ័រធម្មតា តែស្បែកជើងស្រកីដូង មានគុណភាពជាង ជាប់ល្អ ជួយសម្អាតជើង ទុកបានយូរ។
លោក មាគ ស៊ន បានឲ្យដឹងថា មូលហេតុបង្កើតឲ្យមានមណ្ឌលសិប្បកម្ម គឺដើម្បីចង់ជំរុញឲ្យប្រជាពលរដ្ឋពិការ គ ថ្លង់ ស្រ្តីមេម៉ាយ មានការងារធ្វើ ។ ទី ២ ធ្វើការងារក្លាយជាមោទនភាពរបស់បងប្អូនជនពិការ ( រាល់ការងារដែលបង្កើតឡើង តម្រូវទៅតាមកាយសម្បទាដែលអាចធ្វើបាន ប្រព័ន្ធការងារមួយ ឲ្យមនុស្សចេះធ្វើការជាមួយគ្នា ហើយសាកសមជាមួយសមត្ថភាពរៀងៗខ្លួន )។ ទី ៣ ឃើញថា សក្តានុពលរបស់ដូងនៅប្រទេសកម្ពុជាជាដំណាំគ្រួសារ ជាពិសេសខេត្តតាកែវ ទើបមានសិប្បកម្មនេះឡើង ដើម្បីជាអត្តសញ្ញាណខេត្ត តាកែវ ផងដែរ ។ ទី ៤ អ្វីសំខាន់លើកស្ទួយ ឲ្យប្រជាជនមានការងារធ្វើ មានចំណូលអភិវឌ្ឍគ្រួសារឲ្យមានជីវភាពសមរម្យ ។
ក្នុងនាមជាប្រធានមណ្ឌលសិប្បកម្មដូងតាកែវ លោក បានសង្ឈឹមថា ប្រជាជនខ្មែរទាំងអស់ ដែលមានការចាប់អារម្មណ៍ ចេះកែច្នៃ នូវផលិតផល កែច្នៃនូវអ្វីដែលជាសមិទ្ធផលរបស់ខ្មែរ ជាពិសេសធម្មជាតិ ។ ជាមួយគ្នានេះ ក៏ផ្តាំដល់កូនខ្មែរជំនាន់ក្រោយឲ្យមើលពីបរិស្ថានធម្មជាតិ ឲ្យចេះកេច្នៃប្រឌិត ដើម្បីជាការបង្កើតការងារក្នុងស្រុក៕
