លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា និងលោកជំទាវ ព្រមទាំងឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា ជាច្រើនរូបទៀត នារសៀលថ្ងៃទី២០ ខែឧសភា ឆ្នាំ២០២៥ បានអញ្ជើញចូលសួរសុខទុក្ខ សម្តេចអគ្គមហាពញាចក្រី ហេង សំរិន ប្រធានកិត្តិយសក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងសម្តេចធម្មវិសុទ្ធវង្សា សៅ ទី នៅភូមិគ្រឹះចំការមន។
ការអញ្ជើញចូលសួរសុខទុក្ខខាងលើនេះ គឺនៅក្នុងឱកាសនៃទិវាជាតិនៃការចងចាំ ថ្ងៃ២០ ឧសភា និងអបអរសាទរថ្ងៃ៧ មករា កំណើតទី២ផងដែរ។ ក្នុងឱកាសដ៏ឧត្តុង្គឧត្តមនេះ លោកអ្នកឧកញ៉ា លី យ៉ុងផាត់ និងលោកជំទាវ បានគោរពជូនពរសម្តេចទាំងទ្វេ និងក្រុមគ្រួសារជាទីស្រលាញ់ សូមប្រកបដោយសុខភាពល្អបរិបូរណ៍ កាយពលមាំមួន បញ្ញាញាណវាងវៃ ព្រមទាំងវិបុលសុខគ្រប់ប្រការ។
សូមជម្រាបថា សម្តេចអគ្គមហាពញាចក្រី ហេង សំរិន ជាឥស្សរជនមួយរូបដែលបានតស៊ូរួមចំណែកដឹកនាំឱ្យមានចលនាជួយរំដោះប្រទេសកម្ពុជាពីរបបប្រល័យពូជសាសន៍ប៉ុលពត នៅថ្ងៃទី០៧ ខែមករា ឆ្នាំ១៩៧៩។ សម្តេចជាថ្នាក់ដឹកនាំដែលកាន់តួនាទីជាប្រធានរដ្ឋសភា បានយូរជាងគេបំផុតក្នុងប្រវត្តិសាស្ត្រ ចាប់ពីខែមីនា ឆ្នាំ២០០៦ រហូតដល់ខែសីហា ឆ្នាំ២០២៣។ នៅថ្ងៃទី២២ ខែសីហា ឆ្នាំ២០២៣ ព្រះមហាក្សត្របានចេញព្រះរាជក្រឹត្យ តែងតាំងសម្តេច ជាប្រធានកិត្តិយស នៃក្រុមឧត្តមប្រឹក្សាផ្ទាល់ព្រះមហាក្សត្រ មានឋានៈស្មើ នាយករដ្ឋមន្ដ្រី៕
