Makro គ្រោងបោះទុនទឹកប្រាក់ជាង ៨០០លានដុល្លារបន្ថែម លើការពង្រីកអាជីរកម្មខ្លួន

ថ្មីៗនេះ Siam Makro Plc ដែលជាក្រុមហ៊ុនមេរបស់ផ្សារទំនើប Makro និង Lotus បានបង្ហាញពីផែនការរបស់ខ្លួន ក្នុងការរៀបចំបែងចែកទឹកប្រាក់វិនិយោគចន្លោះពី ២៥,៣ពាន់លានបាត ទៅ ២៧,៥ពាន់លានបាត ឬ ៧៤៣លានដុល្លារ ទៅ ៨០៧លានដុល្លារ នៅក្នុងឆ្នាំ ២០២៣ នេះ ដើម្បីពង្រីកអាជីវកម្មលក់រាយ និងលក់ដុំរបស់ខ្លួនបន្ថែមទៀត។ នេះបើតាមការចុះផ្សាយពីកាសែត BangkokPost ។

លោក Sowaluck Thithapant នាយកប្រតិបត្តិក្រុមហ៊ុន Siam Makro បាននិយាយថា ការស្ទុះងើបឡើងវិញនៃសេដ្ឋកិច្ច និងវិស័យទេសចរណ៍ បន្ទាប់ពីមានការបើកដំណើរការពេញលេញឡើងវិញនៃប្រទេសថៃ បានផ្តល់ផលវិជ្ជមានយ៉ាងខ្លាំង ដល់អាជីវកម្មលក់ដុំ និងរាយ ក៏ដូចជាសណ្ឋាគារ ភោជនីយដ្ឋាន និងខ្សែសង្វាក់ម្ហូបអាហារ ជាដើម។

យ៉ាងណាមិញ ជុំវិញផែនការដែលបានគ្រោងទុក វាត្រូវបានគេដឹងថា ក្រុមហ៊ុន Siam Makro នឹងបោះទុនចន្លោះពី ១៣,១ពាន់លានបាត ទៅ ១៤,១ពាន់លានបាត សម្រាប់អាជីវកម្មលក់ដុំ​ របស់ផ្សារទំនើប Makro ខណ:ទឹកប្រាក់ចំនួន ១២,២ពាន់លានបាត ទៅ ១៣,៤ពាន់លានបាត ផ្សេងទៀត នឹងត្រូវវិនិយោគទៅលើអាជីវកម្មលក់រាយរបស់ផ្សារ Lotus រួមទាំងការពង្រីកសាខា និងអភិវឌ្ឍមជ្ឈមណ្ឌលចែកចាយ ប្រព័ន្ធឌីជីថល និងអាជីវកម្មថ្មីៗបន្ថែមទៀត ផងដែរ ។

គួរឱ្យដឹងទៀតផងដែរថា សម្រាប់ឆ្នាំ ២០២៣ នេះ ផ្សារទំនើប Makro លក់ដុំ គ្រោងនឹងបើកសាខាថ្មី ចំនួន ១២ បន្ថែមទៀត នៅក្នុងប្រទេសថៃ​ និងពី ៤ ទៅ ៦ សាខា នៅក្នុងប្រទេសផ្សេងទៀត ដែលកំពុងមានវត្តមានផ្សារ Makro ស្រាប់ ៕