កន្លងមក មហាសេដ្ឋីអាមេរិក Elon Musk តែងតែបង្ហើបថា លោកនឹងចុះចេញពីតំណែងជានាយកប្រតិបត្តិក្រុមហ៊ុន Twitter បើសិនជារកបានអ្នកជំនួសកៅអីមួយនេះ។
យ៉ាងណា ថ្មីៗនេះមេធំ Tesla បានបង្ហោះសារលើបណ្ដាញសង្គម Twitter ថា លោករកបានអ្នកមកស្នងតំណែងនៅក្រុមហ៊ុនចាបខៀវហើយ ដោយបុគ្គលម្នាក់នោះជានារីម្នាក់ ហើយនាងនឹងចាប់ផ្ដើមការងារក្នុងរយៈពេល ៦ សប្ដាហ៍ខាងមុខ។ នេះបើតាមការចុះផ្សាយពី Ibtimes។
បើទោះលែងជា CEO ប្រចាំក្រុមហ៊ុន តែមហាសេដ្ឋីអាមេរិកនៅតែកាន់តំណែងកំពូលក្នុងនាមជាប្រធានប្រតិបត្តិ និងជាប្រធានផ្នែកបច្ចេកវិទ្យា ពិនិត្យមើលរាល់គ្រប់ផលិតផល និងប្រព័ន្ធដំណើរការដដែល។
ចំពោះប្រវត្តិរបស់ CEO ថ្មីម្នាក់នេះ Elon Musk មិនបានបង្ហើបពីព័ត៌មានលំអិតឡើយ ប៉ុន្តែ Wall Street Journal បានរាយការណ៍ថា បុគ្គលម្នាក់នោះអាចជា Linda Yaccarino ប្រធានបច្ចុប្បន្ននៃផ្នែកផ្សាយពាណិជ្ជកម្ម និងភាពជាដៃគូសកលរបស់ NBCUniversal។
យ៉ាងណា វាគ្រាន់តែជាការសន្និដ្ឋានរបស់ WSJ តែប៉ុណ្ណោះ ហើយពួកយើងមានតែរង់ចាំមើលជាក់ស្ដែងពីការប្រកាសដោយផ្ទាល់ពីម្ចាស់ក្រុមហ៊ុន Twitter ដែលនឹងទម្លាយព័ត៌មានមួយនេះនាពេលខាងមុខ៕
