ប្រទេសកូរ៉េខាងត្បូងបានចុះកិច្ចព្រមព្រៀងផ្ដល់ជំនួយផ្នែកហិរញ្ញវត្ថុទៅកាន់ប្រទេសអ៊ុយក្រែន ដែលមានទំហំប្រមាណ ១៣០លានដុល្លារ។ នេះបើតាមការចុះផ្សាយពីសារព័ត៌មាន Kelo។
ប្រភពដដែលបានបន្ថែមថា កិច្ចព្រមព្រៀងមួយនេះគឺមានការចូលរួមពីរដ្ឋមន្ត្រីហិរញ្ញវត្ថុកូរ៉េខាងត្បូង Choo Kyung-ho និងរដ្ឋមន្ត្រីសេដ្ឋកិច្ចអ៊ុយក្រែន Yulia Svyrydenko នៅទីក្រុងសេអ៊ូល ខណៈកញ្ចប់ជំនួយនោះនឹងផ្ដល់តាមរយៈការបរិច្ចាគ និងកម្ចី។
គួររំលឹកដែរថា កូរ៉េខាងត្បូងដែលជាប្រទេសផលិតគ្រាប់កាំភ្លើងធំបំផុតមួយ បាននិយាយថា ពួកគេនឹងមិនផ្ដល់អាវុធសាហាវៗទៅអ៊ុយក្រែនឡើយ ដោយបារម្ភពីទំនាក់ទំនងរវាងកូរ៉េខាងត្បូង និងរុស្ស៊ី។
យ៉ាងណា ប្រធានាធិបតីកូរ៉េខាងត្បូង Yoon Seok Yeol បានផ្ដល់បទសម្ភាសន៍ជាមួយ Reuters កាលពីខែមុនថា រដ្ឋាភិបាលរបស់លោកនឹងមិនអោបដៃឈរមើល ផ្ដល់ជំនួយតែលើហិរញ្ញវត្ថុ និងមនុស្សធម៌ឡើយ ប៉ុន្តែបើករណីមានជនស៊ីវិលអ៊ុយក្រែនស្ថិតក្រោមការវាយប្រហារទ្រង់ទ្រាយធំពីរុស្ស៊ី កូរ៉េខាងត្បូងអាចនឹងផ្គត់ផ្គង់អាវុធ ដ្បិតករណីនេះគឺ សហគមន៍អន្តរជាតិមិនអាចអត់ឱនបានឡើយ៕
