ថ្មីៗនេះ ឥណ្ឌូនេស៊ី កំពុងធ្វើការកំណត់គោលដៅទាញប្រាក់ចំណូលឱ្យបាន ១០ពាន់លានដុល្លារ ពីវិស័យទេសចរណ៍នៅក្នុងឆ្នាំ ២០២៣ នេះ ពោលគឺកើនឡើងពីគោលដៅដែលខ្លួនបានកំណត់យកត្រឹម ៦ពាន់លានដុល្លារ កាលពីដើមឆ្នាំ។ នេះបើតាមការចុះផ្សាយពីសារព័ត៌មាន VNA ។
ដោយថ្លែង នៅក្នុងកិច្ចប្រជុំការងារថ្នាក់ជាតិ របស់សមាគមឧស្សាហកម្មទេសចរណ៍ឥណ្ឌូនេស៊ី (GIPI’s) នៅទីក្រុងហ្សាកាតា កាលពីថ្ងៃទី ២៣ ខែឧសភា រដ្ឋមន្ត្រីក្រសួងទេសចរណ៍ និងសេដ្ឋកិច្ចច្នៃប្រឌិត លោក Sandiaga Salahuddin Uno បាននិយាយថា ប្រាក់ចំណូលពីវិស័យនេះ អាចនឹងត្រូវបានជំរុញ រួមទាំងការបង្កើនចំនួនជើងហោះហើរ ដើម្បីទាក់ទាញភ្ញៀវទេសចរបរទេស ជាមួយនឹងចំនួនគោលដៅ ឱ្យបាន ៨,៥ លាននាក់ នៅឆ្នាំ ២០២៣ នេះ ។
លើសពីនេះ លោក Uno បាននិយាយទៀតថា លោកមានទំនុកចិត្តខ្ពស់ថាគោលដៅនេះ អាចនឹងសម្រេចបាន បន្ទាប់ពីបានមើលឃើញថានៅក្នុងត្រីមាសទីមួយ ឆ្នាំនេះ ចំនួនភ្ញៀវទេសចរបរទេស ដែលបានមកដល់ ត្រូវបានកត់ត្រានៅក្នុងចំនួន ២,២៥ លាននាក់រួចមកហើយ ។
នៅក្នុងឱកាសដដែលនោះ ប្រធាន GIPI លោក Haryadi Sukamdani បាននិយាយថា សមាគមក៏នឹងជំរុញឱ្យមានការបើកជើងហោះហើរត្រង់បន្ថែមទៀត រួមទាំងជាមួយប្រទេសចិន និងឥណ្ឌា ផងដែរ ៕
