ទុរេនវៀតណាមកំពុងត្រូវប៉ាន់ខ្លាំងនៅចិន ខណៈការនាំចូលអាចកើនដល់ ១លានតោន

អន្តរជាតិ

ផ្លែទុរេនវៀតណាម កំពុង​ត្រូវប៉ាន់ខ្លាំងនៅលើទីផ្សារស្រុកចិន ពោល​តាំងពី​មានការ​នាំចូល​ទុរេន​វៀតណាម​កាលពីខែកញ្ញា អ្នកជំនួញចិនជាច្រើនរូប​បាន​ប្រមែប្រមូល​​ផ្លែឈើ​មួយប្រភេទ​នេះ រាប់សែន​តោន​ មកលក់​នៅ​ប្រទេសចិន។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

អ្នកនាំចូលផ្លែឈើម្នាក់ឈ្មោះ Bob Wang បានប្រាប់សារព័ត៌មាន SCMP ថា លោកបានចុះកុងត្រា​ជាមួយ​ម្ចាស់ចំការ​ទុរេនវៀតណាម ៣ ០០០ ហិកតា និងអាចនាំចូលមកលើទីផ្សារចិនបាន​ប្រមាណ ៣ ០០០ កុងទ័រនឺ​ ឬ ៦០ ០០០ តោនក្នុងឆ្នាំនេះ ខណៈចំនួនមួយនេះ គឺច្រើនជាង​កាល​ដែលលោក​នាំទុរេន​ពីថៃ ដល់ទៅ ៣ដងឯណោះ។

បុរសម្នាក់នោះក៏បានបន្ថែមទៀតថា កាលពីឆ្នាំទៅ ចិនបាននាំចូលទុរេនច្រើនជាង ៨២០ ០០០តោន ហើយលោកមានជំនឿចិត្តថា ឆ្នាំនេះ​ទំហំ​ការនាំចូល​នឹង​អាចកើនលើស ៩០០ ០០០តោន​យ៉ាងងាយ។

គួររំលឹកដែរថា ផ្លែទុរេន​កំពុង​ពេញនិយម​ខ្លាំងនៅទីផ្សារស្រុកចិន ហើយទោះបីជាមានការត្រួតពិនិត្យការនាំចូលតឹងរ៉ឹងខ្លាំង ក្នុងអំឡុងពេលជំងឺរាតត្បាតក៏ដោយ ក៏ប្រទេសចិនបាននាំចូលទុរេនច្រើនជាងបួនដងក្នុងឆ្នាំ ២០២២ បើធៀបនឹងឆ្នាំ ២០១៧ ដែលនាំឱ្យតម្លៃសរុបកើនឡើងដល់ជាង ៤ពាន់លានដុល្លារ។

ក្នុងនោះ ថៃជាអ្នកនាំចេញទុរេនធំបំផុត​សម្រាប់ទីផ្សារស្រុកចិន ប៉ុន្តែ​តំណែងមួយនេះ​អាច​រង្គោះរង្គើ ក្រោយ​វៀតណាម និងប្រទេសនៅអាស៊ានផ្សេងទៀតដូចជា ម៉ាឡេស៊ី និងហ្វីលីពីន ក៏​កំពុង​សម្លឹងរកឱកាស​ពង្រីកទីផ្សារទុរេន​របស់ពួកគេ ទៅកាន់ប្រទេសចិនដូចគ្នា៕