បើតាមការឲ្យដឹងពីភ្នាក់ងារចារកម្មអាមេរិកម្នាក់ សុំមិនបញ្ចេញឈ្មោះ បានបញ្ជាក់ថា ចិនកំពុងជួយរុស្ស៊ី គេចចេញពីការដាក់ទណ្ឌកម្មពីលោកខាងលិច ហើយក៏ទំនងកំពុងផ្គត់ផ្គង់បច្ចេកវិទ្យាទំនើបដល់កងកម្លាំងយោធារុស្ស៊ី ក្នុងការឈ្លានពានប្រទេសអ៊ុយក្រែនថែមទៀត។
យោងតាមការចុះផ្សាយពីគេហទំព័រ CNA បានបង្ហាញថា ការវាយតម្លៃដោយការិយាល័យនាយកស៊ើបការណ៍ជាតិ (ODNI) ខាងលើត្រូវបានបោះពុម្ពផ្សាយ ដោយគណៈកម្មាធិការជ្រើសរើសអចិន្ត្រៃយ៍ របស់សភាតំណាងសហរដ្ឋអាមេរិក ស្តីពីការស៊ើបការណ៍សម្ងាត់។
“PRC កំពុងផ្ដល់នូវបច្ចេកវិទ្យាទំនើបទៅកាន់កងយោធារុស្ស៊ី ដើម្បីប្រើប្រាស់សម្រាប់ការរំលោភបំពានបន្ថែមទៅលើអ៊ុយក្រែន បើទោះជាមានការព្យាយាមទប់ស្កាត់ពីសំណាក់លោកខាងលិចក្ដី”។ នេះបើតាមរបាយការណ៍ពី ODNI។
បន្ថែមពីនោះ ODNI ថែមទាំងសង្កត់ធ្ងន់ថា ចិន និងរុស្ស៊ីបានរឹតចំណងមិត្តភាពកាន់តែខ្លាំង បន្ទាប់ពីផ្ទុះសង្គ្រាមនៅអ៊ុយក្រែន ពោលទំហំពាណិជ្ជកម្មរវាងប្រទេសទាំង ២ កើនឡើងខ្ពស់ បើធៀបនឹងមុនពេលមានសង្គ្រាម៕
គួររំលឹកបន្តិចថា កន្លងមកអាមេរិកតែងតែចោទចិនជារឿយៗថា បានផ្គត់ផ្គង់សព្វាវុធទៅកាន់រុស្ស៊ី ហើយវាក៏ជាមូលហេតុដែលចិន តែងតែបដិសេធមិនចូលរួមដាក់ទណ្ឌកម្មលើសម្ព័ន្ធមិត្តត្បូងពេជ្រមួយនេះដូចគ្នា ខណៈភាគីចិនតែងទាត់ចោលពាក្យចោទប្រកាន់ខាងលើ និងអះអាងថា ខ្លួនប្រកាន់ជំហអព្យាក្រឹត្យ និងព្យាយាមចូលរួមដោះស្រាយបញ្ហាសង្គ្រាមនៅអ៊ុយក្រែន តាមបែបសន្តិវិធីប៉ុណ្ណោះ៕
