តម្លៃផ្ទះថ្មីៗនៅប្រទេសចិន មានការធ្លាក់ចុះនាខែកក្កដាកន្លងទៅ ហើយនេះក៏ជាការធ្លាក់ចុះលើកដំបូងក្នុងឆ្នាំ ២០២៣ផងដែរ បន្ទាប់ពីរដ្ឋាភិបាលបានដាក់ចេញនូវគោលនយោបាយគាំទ្រវិស័យអចលនទ្រព្យឡើងវិញ។
យោងតាមរបាយការណ៍ផ្ដល់ឲ្យដោយនាយកដ្ឋានស្ថិតិជាតិ NBS បានបង្ហាញថា តម្លៃផ្ទះថ្មីនាឆ្នាំនេះ ធ្លាក់ចុះប្រហែល ០,២% បើធៀបនឹងឆ្នាំមុន ដែលធ្លាក់ចុះប្រហែល ០,១% ក្នុងរយៈពេល ៧ខែដំបូងដូចគ្នា។
ទន្ទឹមនឹងនោះ សារព័ត៌មាន CNA បានបង្ហាញទៀតថា ការធ្លាក់ចុះនៃតម្លៃផ្ទះថ្មីនៅចិន គឺបណ្ដាលមកពីវិបត្តិបំណុល នៃក្រុមហ៊ុនអភិវឌ្ឍន៍អចលនទ្រព្យធំៗ ការថយចុះនៃទំហំវិនិយោគ និងអត្រាលក់មានការធ្លាក់ចុះជាដើម។
សូមជម្រាបដែរថា វិស័យអចលនទ្រព្យនៅចិន គឺរ៉ាប់រងប្រហែល ១/៤ នៃកំណើនសេដ្ឋកិច្ចសរុបរបស់មហាអំណាចអាស៊ី ហើយបើទោះជាទទួលបានការធានាពីរដ្ឋាភិបាលក្ដី ប៉ុន្តែវិស័យមួយនេះ ហាក់នៅតែស្ថិតក្នុងសភាពយ៉ាប់យ៉ឺន មិនងាយនឹងងើបឡើងវិញរួចឡើយ។
ជាមួយគ្នានោះ ក្នុងចំណោមទីក្រុងចំនួន ៧០ តម្លៃផ្ទះនៅទីក្រុងចំនួន ៤៩ មានការធ្លាក់ចុះក្នុងខែកក្កដា ខណៈកាលពីខែមិថុនា មានតែ ៣៨ទីក្រុងប៉ុណ្ណោះ ដែលជួបប្រទះបញ្ហាមួយនេះ៕
