ប្រព័ន្ធផ្សព្វផ្សាយឡាវ ថ្មីៗនេះបានរាយការណ៍ថា អាជ្ញាធរឡាវ និងថៃ បានពិភាក្សាគ្នា ទៅលើផែនការក្នុងការសាងសង់ផ្លូវល្បឿនលឿន ដែលមានប្រវែង ១៦០ គីឡូម៉ែត្រ ពីខេត្ត Savannakhet ឆ្ពោះទៅកាន់ច្រកព្រំដែន Lao Bao ជាប់ប្រទេសវៀតណាម ។
តាមការចុះផ្សាយពីសារព័ត៌មាន VNA បានឱ្យដឹងថា អភិបាលរងខេត្ត Savannakhet លោក Sensesak Soulysak បានស្នើគម្រោងសាងសង់ផ្លូវល្បឿនលឿននេះ ទៅកាន់អតីតរដ្ឋមន្ត្រីក្រសួងថាមពល និងរ៉ែថៃ លោក Sonthirat Sonthijirawong និងមន្ត្រីថៃដទៃទៀត។
អភិបាលរងខេត្តរូបនេះ បានគូសបញ្ជាក់ទៀតថា រួមជាមួយផ្លូវល្បឿនលឿន ក៏មានការវិនិយោគទៅលើការសាងសង់សណ្ឋាគារលំដាប់ផ្កាយប្រាំ និងទីលានវាយកូនហ្គោល ក៏ដូចជាសេវាកម្មដឹកជញ្ជូនអន្តរជាតិជាដើម ដែលអាចនឹងជួយជំរុញការអភិវឌ្ឍបន្ថែមទៀត នៅក្នុងខេត្តនេះ បន្ទាប់ពីទទួលបាននូវកំណើននៃការវិនិយោគពីបរទេសរួចមកហើយ ទៅលើវិស័យថាមពលកកើតឡើងវិញ។
លោក Sensesak បានបន្ថែមទៀតថា ផ្លូវល្បឿនលឿននេះ នឹងកាន់តែជួយជំរុញពាណិជ្ជកម្មបន្ថែមទៀត ដោយសារតែខេត្តនេះ ស្ថិតនៅក្នុងច្រករបៀងសេដ្ឋកិច្ចបូព៌ា-បស្ចឹម (East-West Economic Corridor) ។
ជម្រាបជូនផងដែរថា បច្ចុប្បន្នប្រទេសថៃ គឺជាអ្នកវិនិយោគបរទេសធំបំផុតទីពីរ នៅក្នុងខេត្ត Savannakhet បន្ទាប់ពីប្រទេសចិន នៅក្នុងឆ្នាំ ២០២៣ នេះ។
