រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយកាលពីពេលថ្មីៗនេះថា ទីក្រុងវ៉ាស៊ីនតោន អាចឈានដល់កិច្ចព្រមព្រៀងជាមួយទីក្រុងតេអេរ៉ង់នៅខែនេះ ដោយធានាលើការបើកច្រកសមុទ្រ Hormuz ទាំងស្រុងឡើងវិញ។ នេះបើតាមការចុះផ្សាយពីសារព័ត៌មាន CNBC។
លោក Bessent បាននិយាយនៅក្នុងបទសម្ភាសជាមួយ CNBC នៅព្រឹកថ្ងៃទី៤ ខែសីហាថា ៖”យើងកំពុងចរចាជាមួយអ៊ីរ៉ង់ ហើយមានសក្តានុពលក្នុងការឈានដល់កិច្ចព្រមព្រៀងនៅថ្ងៃនេះ ឬថ្ងៃស្អែក ដើម្បីបើកច្រកសមុទ្រ Hormuz ឡើងវិញ និងកែប្រែស្ថានភាពជម្លោះឲ្យមានលក្ខណៈល្អប្រសើរជាងមុន”។
យ៉ាងណាមិញ នៅពេលត្រូវបានសួរថាតើអ៊ីរ៉ង់នឹងត្រូវបានអនុញ្ញាតឱ្យគិតថ្លៃសេវាដល់កប៉ាល់ដែលឆ្លងកាត់ច្រកសមុទ្រ Hormuz ដែរឬទេ លោក Bessent គ្រាន់តែឆ្លើយតបវិញថា កិច្ចព្រមព្រៀងនេះនឹងធានាសេរីភាពនៃការធ្វើនាវាចរណ៍ ដោយមិនបានបញ្ជាក់លម្អិតអ្វីបន្ថែមទៀតនោះឡើយ។
គួរជម្រាបជូនថា ជុំវិញសេចក្តីថ្លែងការណ៍របស់លោក Bessent នេះ គឺស្របនឹងការប្រកាសពីមុនពីប្រធានាធិបតីអាមេរិក លោក ដូណាល់ ត្រាំ អំពីការលុបចោលផែនការសម្រាប់ការវាយប្រហារទ្រង់ទ្រាយធំលើអ៊ីរ៉ង់ ដើម្បីសម្រួលដល់កិច្ចខិតខំប្រឹងប្រែងផ្នែកការទូត។ ប៉ុន្តែទន្ទឹមនឹងនោះក្រសួងការបរទេសអ៊ីរ៉ង់នៅតែបន្តបដិសេធ ដោយនិយាយថាខ្លួនគ្មានការចរចាណាមួយជាមួយទីក្រុងវ៉ាស៊ីនតោននោះឡើយ៕
