ផ្លូវដែកឡាវ-វៀតណាម តម្លៃ ៥,៥ពាន់លានដុល្លារ នឹងដាក់ឱ្យដំណើរការនៅឆ្នាំ ២០២៨

យោងតាមប្រព័ន្ធផ្សព្វផ្សាយឡាវ បានបង្ហាញឱ្យដឹងថា គម្រោងផ្លូវដែកឡាវ-វៀតណាម ដែលមានតម្លៃវិនិយោគសរុបប្រមាណ ៥,៥ពាន់លានដុល្លារ ត្រូវបានរំពឹងថានឹងបញ្ចប់ការសាងសង់ និងដាក់ឱ្យដំណើរការនៅឆ្នាំ ២០២៨។

ក្រុមហ៊ុន Petroleum Trading Lao Public Company (PTL) នឹងសហការគ្នាជាមួយក្រុមហ៊ុន Yooshin Engineering Corporation និង Korea National Railway ដើម្បីធ្វើការសិក្សាលម្អិតបន្ថែមទៀតសម្រាប់គម្រោងផ្លូវដែកនេះ នៅមុនពេលចាប់ផ្តើមបើកការសាងសង់។

កិច្ចព្រមព្រៀងសហប្រតិបត្តិការលើគម្រោងនេះ ត្រូវបានចុះហត្ថលេខាដោយប្រធានក្រុមហ៊ុន ​Petroleum Trading Lao Public Company (PTL) លោក Chanthone Sitthixay រួមជាមួយប្រធានសាជីវកម្មវិស្វកម្ម Yooshin លោក Chon Kyung-soon និងនាយកប្រតិបត្តិក្រុមហ៊ុន Korea National Railway លោក Jin-Hyun នៅទីក្រុងវៀងចន្ទន៍ ប្រទេសឡាវ កាលពីសប្តាហ៍មុន។

គួរឱ្យដឹងថា គម្រោងផ្លូវរថភ្លើងនេះ នឹងត្រូវសាងសង់ក្នុងចម្ងាយប្រហែល ៥០០ គីឡូម៉ែត្រ ហើយនឹងត្រូវចែកចេញជាពីរផ្នែក ដោយផ្នែកទីមួយ មានចម្ងាយ ៣១២ គីឡូម៉ែត្រ តភ្ជាប់ពីទីក្រុងវៀងចន្ទន៍ និងស្រុក Thakhek នៃខេត្ត Khammouane និងផ្នែកទីពីរ មានប្រវែង ១៣៩ គីឡូម៉ែត្រ តភ្ជាប់ពីស្រុក Thakhek ទៅកាន់ព្រំដែនឡាវ-វៀតណាម។

ជម្រាបជូនថា នៅពេលបញ្ចប់ការសាងសង់ ផ្លូវដែកឡាវ-វៀតណាម នឹងចូលរួមចំណែកក្នុងការអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនឱ្យកាន់តែទំនើប និងមានស្តង់ដារ ស្របពេលវាក៏នឹងកាត់បន្ថយថ្លៃដឹកជញ្ជូន ដើម្បីលើកកម្ពស់ការអភិវឌ្ឍសេដ្ឋកិច្ចសង្គម របស់ប្រទេសឡាវ ផងដែរ៕