កាលពីថ្ងៃពុធ ទី០៦ ខែកញ្ញាម្សិលមិញ នាយករដ្ឋមន្ត្រីថៃ លោក Srettha Thavisin បានលើកឡើងថា ប្រទេសថៃប្រៀបដូចជាអ្នកជំងឺម្នាក់ ដែលរងគ្រោះដោយសារជំងឺកូវីដ១៩ ធ្ងន់ធ្ងរ ត្រូវការការព្យាបាលយ៉ាងយកចិត្តទុកដាក់។
ការលើកឡើងបែបនេះ គឺទាក់ទងទៅនឹងគោលនយោបាយផ្ដល់ប្រាក់ទៅកាន់ប្រជាជនប្រមាណ ៥៥លាននាក់ ដោយក្នុងម្នាក់ទទួលបានប្រហែល ២៨០ដុល្លារ ដើម្បីសម្រួលដល់កំណើនសេដ្ឋកិច្ចក្នុងស្រុកវិញ។ នេះបើតាមការចុះផ្សាយពីសារព័ត៌មាន SCMP។
“ប្រទេសថៃគឺប្រៀបដូចជាអ្នកជំងឺម្នាក់ ដោយសារការរាតត្បាតកូវីដ១៩ ធ្វើឲ្យយើងខូចខាតច្រើនជាងគេ បើធៀបនឹងប្រទេសជិតខាង ហើយក៏ប៉ះពាល់ខ្លាំងដល់វិស័យទេសចរណ៍ ដែលជាចលករសំខាន់ ក្នុងការជួយដល់សេដ្ឋកិច្ចយើងថែមទៀត”។ នេះបើតាមការអះអាងរបស់លោក Srettha។
នាយករដ្ឋមន្ត្រីថៃរូបនេះ ក៏បានមានប្រសាសន៍ទៅកាន់រដ្ឋសភាថា៖ ការចំណាយ កំពុងងើបឡើងវិញយឺត បណ្ដាលឲ្យកើតមានហានិភ័យវិបត្តិសេដ្ឋកិច្ច ដូច្នេះទើបតម្រូវឲ្យមានវិធានការ ជំរុញកំណើនសេដ្ឋកិច្ចជាបន្ទាន់។
សូមជម្រាបដែរថា គោលនយោបាយចែកប្រាក់ជូនប្រជាជនតាមរយៈប្រព័ន្ធឌីជីថល ប្រមាណ ៥៥លាននាក់នោះ រដ្ឋាភិបាលអាចនឹងចាយលុយប្រហែល ៥៦០ពាន់លានបាត ឬប្រមាណ ១៦លានដុល្លារ ខណៈពលរដ្ឋដែលទទួលបានអត្ថប្រយោជន៍នេះ នឹងតម្រូវឲ្យចាយវាយលើការទិញទំនិញ និងសេវាកម្មនៅសង្កាត់រៀងៗខ្លួន ក្នុងរយៈពេល ៦ខែ៕
