រដ្ឋាភិបាលឥណ្ឌូនេស៊ី ថ្មីៗនេះ បានធ្វើការប្រកាសពីផែនការក្នុងការជំរុញទីផ្សារអលចនទ្រព្យ ជាមួយនឹងការបន្ធូរបន្ថយពន្ធលើតម្លៃបន្ថែម (VAT) និងសេវាថ្លៃរដ្ឋបាល មកនៅត្រឹម ៤លានរូពី (២៥២ដុល្លារ) ប៉ុណ្ណោះ សម្រាប់អ្នកទិញផ្ទះ ដែលមានប្រាក់ចំណូលទាប។ នេះបើតាមការចុះផ្សាយពីសារព័ត៌មាន VNA។
ប្រធានាធិបតីឥណ្ឌូនេស៊ី លោក ចូកូ វីដូដូ បាននិយាយកាលពីថ្ងៃទី២៤ ខែតុលា នៅឯកិច្ចប្រជុំកំពូលBNI Investor Daily Summit 2023 ថា ប្រទេសឥណ្ឌូនេស៊ី នឹងផ្តល់ការលើកទឹកចិត្តបន្ថែមទៀត ខណៈបច្ចុប្បន្នផែនការមួយនេះនៅមិនទាន់បញ្ចប់ទាំងស្រុងឡើយ ពោលវាអាចនឹងបន្ថែមអត្ថប្រយោជន៍ជាច្រើនទៀត ដល់វិស័យអចលនទ្រព្យ។
លោក វីដូដូ បាននិយាយទៀតថា ប្រាក់ចំណូលទទួលបានពីពន្ធក្នុងខែតុលា គឺកើនឡើង ៥,៦% ពីកម្រិតមូលដ្ឋានកាលពីឆ្នាំមុន។ ហើយចំពោះការកើនឡើងនេះ បានបង្ហាញថា អាជីវកម្មក្នុងស្រុកក៏កំពុងតែមានការកើនឡើងផងដែរ ។
ទន្ទឹមនឹងនេះ រដ្ឋមន្ត្រីក្រសួងសម្របសម្រួលសេដ្ឋកិច្ច លោក Airlangga Hartarto បាននិយាយនៅក្នុងព្រឹត្តិការណ៍ដូចគ្នានេះថា ចំពោះផែនការលើកលែងពន្ធលើតម្លៃបន្ថែមនេះ គ្រោងត្រូវអនុវត្តរហូតដល់ពាក់កណ្តាលឆ្នាំ ២០២៤ ចំពោះការទិញអចលនទ្រព្យ ដែលមានតម្លៃតិចជាង ២ពាន់លានរូពី (១២៥ ៧១៤ដុល្លារ)៕
