កាលពីថ្ងៃទី១៥ ខែវិច្ឆិកា ប្រធានាធិបតីសហរដ្ឋអាមេរិក លោក ចូ បៃដិន និងមេដឹកនាំកំពូលចិន លោក ស៊ី ជិនពីង បានជួបជជែកគ្នាមួយទល់មួយ ក្នុងកិច្ចប្រជុំក្រៅផ្លូវការនៃវេទិកា APEC ធ្វើឡើងនៅទីក្រុង San Francisco សហរដ្ឋអាមេរិក។
យោងតាមការចុះផ្សាយពីសារព័ត៌មាន Reuters បានរាយការណ៍ថា មេដឹកនាំកំពូលទាំង២ បានជជែកគ្នាអស់រយៈពេលជាង ៤ម៉ោង ហើយជាលទ្ធផល ប្រទេសទាំង២ យល់ព្រមបន្តកិច្ចសហប្រតិបត្តិការលើវិស័យយោធា និងប្រតិបត្តិការប្រឆាំងការជួញដូរគ្រឿងញៀន ខណៈលទ្ធផលទាំងនេះ គឺដូចទៅនឹងអ្វី ដែលអ្នកវិភាគធ្លាប់បានលើកឡើងកាលពីពេលកន្លង។
បន្ថែមពីនោះ មេដឹកនាំអាមេរិកបានអះអាងថា ការប្រកួតប្រជែងរវាងប្រទេសទាំង២ នឹងមិនអាចឈានដល់ការបង្កជម្លោះឡើយ ហើយប្រទេសទាំង២ ព្យាយាមគ្រប់គ្រង និងធ្វើការរួមគ្នា ប្រយុទ្ធប្រឆាំងនឹងបញ្ហាបម្រែបម្រួលអាកាសធាតុ ប្រឆាំងគ្រឿងញៀន និងតម្រូវការបច្ចេកវិទ្យា AI ជាដើម។
សូមជម្រាបដែរថា នេះគឺជាការជួបគ្នាទល់មុខលើកដំបូងរវាងប្រធានាធិបតី ចូ បៃដិន និងបុរសខ្លាំងរដ្ឋចិន លោក ស៊ី ជិនពីង នៅក្នុងឆ្នាំនេះ ខណៈការជួបគ្នាចុងក្រោយរវាងអ្នកទាំង២ គឺកើតឡើង កាលពីឆ្នាំទៅ ក្នុងកិច្ចប្រជុំកំពូល G20 ធ្វើឡើងនៅកោះបាលី ប្រទេសឥណ្ឌូណេស៊ី៕
