មេដឹកនាំកំពូលចិន លោក ស៊ី ជិនពីង បានប្រាប់ទៅកាន់ប្រធានាធិបតីអាមេរិក លោក ចូ បៃដិន ថា សូមបញ្ឈប់ជាបន្ទាន់រាល់សកម្មភាពគាំទ្រដល់កោះតៃវ៉ាន់ ព្រោះការបង្រួបបង្រួមជាតិរវាងចិន និងតៃវ៉ាន់ គឺជារឿងដែលមិនអាចបញ្ឈប់បានឡើយ។ នេះបើតាមការចុះផ្សាយពីសារព័ត៌មាន CNA។
ក្រសួងការបរទេសចិនក៏បានចេញសេចក្ដីប្រកាសមួយដែរថា៖ ភាគីអាមេរិកគួរតែបញ្ឈប់ការផ្ដល់ជំនួយយោធា ដល់តៃវ៉ាន់ ហើយងាកមកគាំទ្រការបង្រួបបង្រួមជាតិដ៏មានសន្តិភាពវិញ។ ប្រទេសចិនត្រូវតែសម្រេចបាននូវការរួបរួមគ្នា ហើយវាគ្មានអ្វីអាចបញ្ឈប់ផែនការនេះបានឡើយ។
ជាមួយគ្នានេះ មន្ត្រីជាន់ខ្ពស់អាមេរិកមួយរូបបានប្រាប់បណ្ដាញសារព័ត៌មានថា បញ្ហាកោះតៃវ៉ាន់ គឺជាបញ្ហាធំបំផុត ដែលធ្វើឲ្យទំនាក់ទំនងរវាងចិន និងអាមេរិក ធ្លាក់ដល់ចំណុចអាក្រក់បែបនេះ ខណៈមន្ត្រីជាន់ខ្ពស់រូបនេះសង្កត់ធ្ងន់ថា ចិននឹងមិនបញ្ឈប់គំនិតរួបរួមជាមួយតៃវ៉ាន់ឡើយ បើទោះជាពួកគេត្រូវប្រើធម៌ក្ដៅក៏ដោយ។
សូមជម្រាបដែរថា កន្លងមករដ្ឋាភិបាលក្រុងប៉េកាំង តែងតែអះអាងថា តៃវ៉ាន់គឺជាផ្នែកមួយនៃប្រទេសចិន ខណៈពួកគេនឹងមិនប្រើអំពើហិង្សាដើម្បីបង្រួបបង្រួមទឹកដីឡើយ ប៉ុន្តែប៉ុន្មានខែមុននេះ គេសង្កេតឃើញថា ចិនតែងតែបើកសមយុទ្ធយោធានៅក្បែរកោះតៃវ៉ាន់ជាញឹកញយ៕
