នាយកប្រតិបត្តិនៃក្រុមហ៊ុនតាក់ស៊ីគ្មានមនុស្សបើក Cruise ដែលជាក្រុមហ៊ុនបុត្រសម្ព័ន្ធ General Motors លោក Kyle Vogt បានប្រកាសលាលែងពីតំណែង បន្ទាប់ពីក្រុមហ៊ុនទទួលបានការរិះគន់លើផ្នែកសុវត្ថិភាព។
យោងតាមការចុះផ្សាយពីសារព័ត៌មាន Reuters បានរាយការណ៍ថា លោក Vogt បានសរសេរសារទៅកាន់ក្រុមបុគ្គលិក ដោយពន្យល់ខ្លីៗថា ក្នុងនាមលោកជាក្បាលម៉ាស៊ីនក្រុមហ៊ុន លោកត្រូវតែទទួលខុសត្រូវ ចំពោះបញ្ហាដែលក្រុមហ៊ុនជួបប្រទះ។
គួររំលឹកបន្តិចថា រយៈពេលប៉ុន្មានខែចុងក្រោយនេះ ក្រុមហ៊ុនតាក់ស៊ីគ្មានមនុស្សបើក Cruise ទទួលបានការរិះគន់យ៉ាងខ្លាំង ពីអាជ្ញាធរអាមេរិក ក្រោមហេតុផលបារម្ភពីសុវត្ថិភាពអតិថិជន បើទោះជាមានការបើកសាកល្បងទទួលបានជោគជ័យក្ដី។
ជាមួយគ្នា នាដើមខែវិច្ឆិកានេះ នាយកដ្ឋានយានយន្តរដ្ឋកាលីហ្វ័រញ៉ា (DMV) បានបញ្ជាឲ្យក្រុមហ៊ុន Cruise ដកចេញឲ្យអស់ នូវរថយន្តគ្មានមនុស្សបើករបស់ខ្លួនតាមដងផ្លូវ ដោយអះអាងថា វាធ្វើឲ្យខូចសណ្ដាប់ធ្នាប់សាធារណៈ ខណៈក្រុមហ៊ុនយល់ខុសពីការប្រើប្រាស់បច្ចេកវិទ្យារបស់ខ្លួន ដែលអាចប៉ះពាល់ដល់សុវត្ថិភាពរបស់មនុស្ស៕
