ក្រុមហ៊ុនខ្នាតយក្សជប៉ុន Sony Group បានសម្រេចលុបចោលគម្រោងរួមបញ្ចូលជាមួយក្រុមហ៊ុនឥណ្ឌា Zee Entertainment ដែលមានតម្លៃរហូតដល់ ១០ពាន់លានដុល្លារ បន្ទាប់ពីចរចារគ្នារយៈពេល២ឆ្នាំ ខណៈគម្រោងមួយនេះត្រូវបានគេរំពឹងថា នឹងក្លាយជាប្រព័ន្ធផ្សព្វផ្សាយធំបំផុតមួយនៅតំបន់អាស៊ីខាងត្បូង។ នេះបើតាមការចុះផ្សាយពីសារព័ត៌មាន Reuters។
ភាពបរាជ័យនៃកិច្ចព្រមព្រៀងមួយនវ កាន់តែធ្វើឲ្យស្ថានីយទូរទស្សន៍ Zee ធ្លាក់ចូលក្នុងសភាពមិនច្បាស់លាស់ ស្របពេលក្រុមហ៊ុនគូប្រជែងធំៗដូចជា Disney ក៏កំពុងស្វែងរកការសហការជាមួយក្រុមហ៊ុនមហាសេដ្ឋីឥណ្ឌា លោក Mukesh Ambani សម្រាប់ការរួមបញ្ចូលលើប្រព័ន្ធផ្សព្វផ្សាយជាដើម។
ជាមួយគ្នា ក្រុមហ៊ុនឥណ្ឌា Zee បានប្រាប់ទៅកាន់ផ្សារហ៊ុនឥណ្ឌាថា ក្រុមហ៊ុន Sony បានទាមទារសំណង ៩០លានដុល្លារ ចំពោះការលុបចោលកិច្ចព្រមព្រៀងមួយនេះ ដោយចោទពួកគេថា បានរំលោភលើកិច្ចព្រមព្រៀង ប៉ុន្តែក្រុមហ៊ុនឥណ្ឌាមិនព្រមបង់ប្រាក់ ថែមទាំងប្រាប់ទៅកាន់ក្រុមហ៊ុនជប៉ុន Sony ថា ត្រៀមខ្លួនឡើងតុលាការថែមទៀត។
ដោយឡែក ក្រុមហ៊ុន Sony វិញក៏បានចេញសេចក្ដីថ្លែងការណ៍មួយថា មូលហេតុដែលធ្វើឲ្យកិច្ចព្រមព្រៀងតម្លៃ ១០ពាន់លានដុល្លារ មិនអាចសម្រេចទៅបាន ដោយសារតែភាគីក្រុមហ៊ុន Zee មិនអាចសម្រេចបានលក្ខខ័ណ្ឌដែលខ្លួនចង់បាន ហើយភាគីទាំងសងខាងក៏មិនព្រមពន្យារពេលចរចាកិច្ចកុងត្រា ដែលបានបញ្ចប់កាលពីថ្ងៃទី២១ ខែមករាដូចគ្នា។
រំលឹកបន្តិចថា កិច្ចព្រមព្រៀងតម្លៃប្រមាណ ១០ពាន់លានដុល្លារ រវាងក្រុមហ៊ុន Sony និងក្រុមហ៊ុន Zee ត្រូវបានប្រកាសដំបូងកាលពីខែកញ្ញ ឆ្នាំ២០២១ ប៉ុន្តែក្រោយចរចាគ្នារយៈពេល ២ឆ្នាំ ផែនការមួយនេះត្រូវបានរំសាយចោលវិញ ក្រោយភាគីទាំងសងខាងមិនអាចបំពេញតម្រូវការឲ្យគ្នា តាមអ្វីដែលពួកគេចង់បានរៀងៗខ្លួន៕
