កាលពីថ្ងៃទី២០ ខែមីនា សមាជិកសភាអាមេរិកបានចេញមុខស្នើឲ្យរដ្ឋបាលលោក បៃដិន ដំឡើងពន្ធឲ្យកាន់តែខ្ពស់ចំពោះដ្រូន (យន្តហោះគ្មានមនុស្សបើក) របស់ចិន ក្នុងគោលបំណងជំរុញ ព្រមទាំងលើកទឹកចិត្តទៅដល់ក្រុមហ៊ុនផលិតដ្រូនរបស់សហរដ្ឋអាមេរិក។
បើតាមសារព័ត៌មាន Reuters បានចុះផ្សាយថា លោក Mike Gallagher ប្រធានគណៈកម្មាធិការទទួលបន្ទុកកិច្ចការចិន របស់សភាតំណាងរាស្រ្តសហរដ្ឋអាមេរិក ព្រមទាំងមេដឹកនាំគណបក្សប្រជាធិបតេយ្យលោក Raja Krishnamoorthi និងសមាជិកសភាចំនួន ១១រូបផ្សេងទៀត ក៏បានធ្វើការជំរុញឲ្យរដ្ឋបាលចាត់វិធានការជាបន្ទាន់ ប្រឆាំងនឹងក្រុមហ៊ុនផលិតដ្រូនដូចជា DJI និង Autel ជាដើម។
ជាមួយគ្នា សមាជិកសភាទាំងនោះបាននិយាយនៅក្នុងលិខិតមួយ ទៅកាន់តំណាងពាណិជ្ជកម្មសហរដ្ឋអាមេរិក ក្រសួងពាណិជ្ជកម្ម និងនាយកដ្ឋានសន្តិសុខមាតុភូមិដូច្នេះថា៖ “បញ្ឈប់ការពង្រីកទីផ្សារបច្ចេកវិទ្យានៅក្នុងសហរដ្ឋអាមេរិក ដែលវាបានបង្កនូវការគំរាមកំហែងយ៉ាងច្បាស់ចំពោះសន្តិសុខ និងសេដ្ឋកិច្ចជាតិ។ បច្ចុបន្នពន្ធបន្ថែម២៥% លើដ្រូនរបស់ចិន គឺមិនទាន់គ្រប់គ្រាន់ដើម្បីប្រយុទ្ធប្រឆាំង អំពីការកើនឡើងនៃការនាំចូលនោះទេ”។
សូមជម្រាបថា ក្រុមហ៊ុនផលិតដ្រូនចិន បានក្ដោបក្ដាប់ចំណែកទីផ្សារដល់ទៅ៧៧% លើដ្រូនដែលជាឧបករណ៍លេងកម្សាន្ត និងច្រើនជាង៩០% នៃដ្រូនសម្រាប់ការធ្វើអាជីវកម្មនៅលើទីផ្សារអាមេរិក៕
