ក្រុមហ៊ុនអាកាសចរណ៍លំដាប់កំពូលរបស់វៀតណាម Vietjet នៅថ្ងៃចន្ទនេះ បានយល់ព្រមលើការបញ្ជាទិញយន្តហោះថ្មីៗ ពីក្រុមហ៊ុន Airbus សម្រាប់យន្តហោះប្រភេទតួខ្លួនទូលាយ A330neo ចំនួន ២០ គ្រឿងបន្ថែមទៀត ចំពេលប្រធានាធិបតីបារាំង លោក Emmanuel Macron កំពុងស្ថិតនៅនៅទីក្រុងហាណូយ ដើម្បីជួបជាមួយមេដឹកនាំវៀតណាម។ នេះបើតាមការចុះផ្សាយពីសារព័ត៌មាន CNA។
ក្រុមហ៊ុន Vietjet បាននិយាយថា សម្រាប់កិច្ចព្រមព្រៀងចុងក្រោយនេះ នឹងនាំមកនូវការបញ្ជាទិញយន្តហោះ A330neo សរុបកើនឡើងដល់ចំនួន ៤០ គ្រឿង បន្ទាប់ពីមានកិច្ចព្រមព្រៀងមួយដែលត្រូវបានចុះហត្ថលេខាកាលពីឆ្នាំមុន សម្រាប់ការបញ្ជាទិញយន្តហោះចំនួន A330neo ចំនួន ២០ គ្រឿងរួចម្តងហើយ។
យ៉ាងណាក៏ដោយ ក្រុមហ៊ុនហាក់មិនបានទម្លាយឲ្យដឹងអំពីការចំណាយ ឬព័ត៌មានលម្អិតផ្សេងទៀតអំពីកាលវិភាគនៃការដឹកជញ្ជូននោះទេ ប៉ុន្តែបាននិយាយថា ការបញ្ជាទិញថ្មីនេះ នឹងនាំឲ្យនូវការគាំទ្រដល់ការពង្រីកយុទ្ធសាស្ត្រនៃជើងហោះហើររបស់ក្រុមហ៊ុន ក្នុងទសវត្សក្រោយ។
គួរឲ្យដឹងថាកិច្ចព្រមព្រៀងថ្មីផងដែរនេះ ត្រូវបានចុះហត្ថលេខាដោយប្រធានក្រុមហ៊ុន VietJet លោកស្រី Nguyen Thi Phuong Thao និងលោក Wouter van Wersch នាយកប្រតិបត្តិជាន់ខ្ពស់របស់ក្រុមហ៊ុន Airbus ។
ជាមួយគ្នានេះ លោកស្រី Thao បាននិយាយថា ការបញ្ជាទិញថ្មីនេះ នឹងបន្តគាំទ្រដល់ការពង្រីកបណ្តាញជើងហោះហើរជាសាកលរបស់ VietJet ខណៈដែលក្រុមហ៊ុន មានគម្រោងជំរុញការហោះហើរនៅទូទាំងតំបន់អាស៊ីប៉ាស៊ីហ្វិក និងអាចផ្តោតទៅលើសេវាកម្មហោះហើរផ្លូវឆ្ងាយទៅកាន់អឺរ៉ុប នាពេលអនាគត។
ជម្រាបជូនផងដែរថា ការប្រកាសនេះ ត្រូវបានធ្វើឡើង ក្នុងអំឡុងពេលប្រធានាធិបតីបារាំង លោក Emmanuel Macron កំពុងចាប់ផ្តើមបំពេញទស្សនកិច្ចនៅក្នុងប្រទេសវៀតណាម ជាមួយក្តីសង្ឃឹមថា នឹងចុះហត្ថលេខាលើកិច្ចព្រមព្រៀងសំខាន់ៗចំនួន៣០ ក្នុងគោលបំណងជំរុញកិច្ចសហប្រតិបត្តិការក្នុងវិស័យជាច្រើនរួមមាន អាកាសចរណ៍ ថាមពលនុយក្លេអ៊ែរ ផ្លូវដែក ការកកើតឡើងវិញ ស្រាវជ្រាវ ផ្កាយរណប និងវិស័យការពារជាតិ ជាដើម៕
