រដ្ឋាភិបាលអាល្លឺម៉ង់ បានប្រកាសផ្តល់កញ្ចប់ជំនួយយោធាតម្លៃ ៥,៦៥ពាន់លានដុល្លារ សម្រាប់ប្រទេសអ៊ុយក្រែន ក្នុងអំឡុងពេលដំណើរទេស្សនកិច្ចរបស់ប្រធានាធិបតីលោក Volodymyr Zelensky ទៅកាន់ទីក្រុងប៊ែរឡាំង។ នេះបើយោងតាមការចុះផ្សាយពីសារព័ត៌មាន Reuters។
រដ្ឋមន្ត្រីការពារជាតិអាល្លឺម៉ង់ លោក Boris Pistorius និងរដ្ឋមន្ត្រីការពារជាតិអ៊ុយក្រែនលោក Rustem Umerov បានចុះហត្ថលេខាលើកិច្ចព្រមព្រៀងមួយ ដែលមានទំហំទឹកប្រាក់ប្រមាណ ៥ពាន់លានអឺរ៉ុប ដោយក្នុងនោះរួមមានទាំងការវិនិយោគផ្ទាល់របស់អាល្លឺម៉ង់ នៅក្នុងឧស្សាហកម្មការពារជាតិអ៊ុយក្រែន និងការប្តេជ្ញាចិត្តយ៉ាងទូលំទូលាយរវាងក្រុមហ៊ុនផលិតអាវុធនៃប្រទេសទាំងពីរ ផងដែរ។
នៅក្រោមកិច្ចព្រមព្រៀងនេះ អាឡឺម៉ង់ នឹងផ្តល់ការគាំទ្រផ្នែកហិរញ្ញវត្ថុបន្ថែមសម្រាប់អ៊ុយក្រែន ក្នុងការផលិតអាវុធរយៈចម្ងាយឆ្ងាយ ក្នុងស្រុក ដោយទាញយកអត្ថប្រយោជន៍ពីសមត្ថភាពឧស្សាហកម្ម និងជំនាញបច្ចេកទេសដែលមានស្រាប់របស់ប្រទេស ខណ:សព្វាវុធភាគច្រើន ត្រូវបានគេរំពឹងថានឹងចែកចាយ នៅចុងឆ្នាំ២០២៥។
គួរឲ្យដឹងថា កិច្ចព្រមព្រៀងចុងក្រោយនេះ ត្រូវបានប្រកាស បន្ទាប់ពីអធិការបតីអាល្លឺម៉ង់ លោក Friedrich Merz បានជួបជាមួយប្រធានាធិបតីអ៊ុយក្រែន លោក Volodymyr Zelensky ដែលកំពុងបំពេញទស្សនកិច្ចនៅទីក្រុងប៊ែរឡាំង។ មានការរំពឹងទុកថា អាឡឺម៉ង់ ក៏នឹងប្រកាសការសម្រេចចិត្តរបស់ខ្លួន ក្នុងការផ្តល់កាំជ្រួចមីស៊ីលឆ្លងទ្វីប Taurus ដល់អ៊ុយក្រែន ក្នុងអំឡុងទស្សនកិច្ចនេះផងដែរ បន្ទាប់ពីការបដិសេធជាយូរមក ដោយសារការព្រួយបារម្ភអំពីការកើនឡើងភាពតានតឹងជាមួយរុស្ស៊ី។
ជម្រាបជូនផងដែរថា អាល្លឺម៉ង់ជាអ្នកគាំទ្រដ៏ធំបំផុតមួយរបស់អ៊ុយក្រែន ក្នុងជម្លោះរវាងទីក្រុងគៀវ និងម៉ូស្គូ។ គិតត្រឹមដើមខែឧសភា ប្រទេសនេះបានផ្តល់ជំនួយជិត ៥០ពាន់លានដុល្លាររួចមកហើយ ដល់ប្រទេសអ៊ុយក្រែន។ នេះបើយោងតាមតួលេខរបស់រដ្ឋាភិបាលអាល្លឺម៉ង់៕
