រដ្ឋមន្ត្រីក្រសួងការពារជាតិអាមេរិក លោក Pete Hegseth កាលពីពេលថ្មីៗនេះ បាននិយាយលើកសរសើរចំពោះចក្ខុវិស័យយុទ្ធសាស្រ្តរបស់អតីតនាយករដ្ឋមន្ត្រីសិង្ហបុរី លោក Lee Kuan Yew ថាគោលនយោបាយដឹកនាំប្រទេសរបស់លោក គឺស្រដៀងទៅនឹងប្រធានាធិបតីអាមេរិក លោក ដូណាល់ ត្រាំ។ នេះបើតាមការចុះផ្សាយពីសារព័ត៌មាន AFP។
ដោយថ្លែងនៅក្នុងកិច្ចសន្ទនា Shangri-La ដែលជាព្រឹត្តិការណ៍ដ៏សំខាន់មួយប្រមូលផ្តុំដោយមេដឹកនាំការពារជាតិកំពូលៗ មកពីជុំវិញពិភពលោក ដែលរៀបចំធ្វើឡើងក្នុងប្រទេសសិង្ហបុរីនៅថ្ងៃនេះ រដ្ឋមន្ត្រីការពារជាតិអាមេរិក Pete Hegseth បានធ្វើការប្រៀបធៀបប្រធានាធិបតីអាមេរិក លោក ដូណាល់ ត្រាំ និងស្ថាបនិកប្រទេសសិង្ហបុរី លោក Lee Kuan Yew ថាជា “បុរសប្រចាំប្រវត្តិសាស្ត្រដែលតែងតែចង់បានការសហការ និងគោរពលើផលប្រយោជន៍រួម”។
មិនតែប៉ុណ្ណោះ លោក Hegseth ក៏បានសរសើរការដឹកនាំដ៏ឈ្លាសវៃ និងចក្ខុវិស័យយុទ្ធសាស្ត្ររបស់លោក Lee ដែលបានដឹកនាំប្រទេសសិង្ហបុរីអស់រយៈពេលបីទសវត្សមកថា “ប្រធានាធិបតី លោក ត្រាំ គឺដូចគ្នាទៅនឹងអតីតនាយករដ្ឋមន្ត្រី លោក Lee ដែរ ពោលអ្នកទាំងពីរ បានបន្តវិធីសាស្រ្តដោយផ្អែកលើសុភវិនិច្ឆ័យ និងផលប្រយោជន៍ជាតិ ជាធំ” ។
រំឭកផងដែរថា អតីតនាយករដ្ឋមន្ត្រី លោក Lee Kuan Yew ដែលបានប្រែក្លាយសិង្ហបុរីទៅជាមជ្ឈមណ្ឌលឧស្សាហកម្ម បច្ចេកវិទ្យាខ្ពស់ និងហិរញ្ញវត្ថុកំពូលមួយរបស់ពិភពលោក បានទទួលមរណភាព កាលពីជាងមួយទសវត្សមុន ប៉ុន្តែកេរ្តិ៍ឈ្មោះរបស់លោក នៅតែត្រូវបានបន្តគោរពដោយប្រជាជនសិង្ហបុរីជាប់ជានិច្ច និងថែមទាំងត្រូវបានគេដាក់ឈ្មោះថាជាស្ថាបនិករបស់ប្រទេសសិង្ហបុរី ផងដែរ។
ជម្រាបជូនថា លោក Hegseth បានជួបជាមួយនាយករដ្ឋមន្ត្រីសិង្ហបុរីលោក Lawrence Wong កាលពីថ្ងៃទី៣០ ឧសភា ដែលក្នុងនោះភាគីទាំងពីរបានសង្កត់ធ្ងន់លើកិច្ចសហប្រតិបត្តិការលើវិស័យការពារជាតិ និងបញ្ជាក់ឡើងវិញនូវការប្តេជ្ញាចិត្តរួមគ្នារបស់ពួកគេចំពោះសន្តិភាព និងស្ថិរភាពក្នុងតំបន់។ លោក Hegseth គឺជាសមាជិកគណៈរដ្ឋមន្ត្រីអាមេរិកដំបូងគេដែលបានជួបលោកនាយករដ្ឋមន្ត្រី Wong ចាប់តាំងពីមេដឹកនាំសិង្ហបុរីចូលកាន់តំណែង នៅដើមខែនេះមក៕
