ប្រធានមូលនិធិរូបិយវត្ថុអន្តរជាតិ ហៅកាត់ IMF អ្នកស្រី Kristalina Georgieva បាននិយាយថា ហានិភ័យនៃស្ថិរភាពហិរញ្ញវត្ថុពិភពលោកកំពុងមានការកើនឡើង និងសំណូមពរឲ្យគ្រឺះស្ថានហិរញ្ញវត្ថុធំៗ បន្តការប្រុងប្រយ័ត្នឲ្យកាន់តែខ្លាំង។
យោងតាមការចុះផ្សាយពី CNA បានបង្ហាញថា មេធំ IMF បានបញ្ជាក់ជាថ្មីពីទស្សនៈរបស់អ្នកស្រីថា ឆ្នាំ២០២៣នេះ នឹងក្លាយជាឆ្នាំដែលមានការប្រកួតប្រជែងម្ដងទៀត ដ្បិតកំណើនសេដ្ឋកិច្ចពិភពលោកអាចធ្លាក់ចុះក្រោម ៣% ដោយសារមិនទាន់ងើបរួចទាំងស្រុងពីជំងឺរាតត្បាត ស្របពេលសង្គ្រាមនៅអ៊ុយក្រែនកំពុងមានសភាពក្ដៅគគុក។
មិនតែប៉ុណ្ណោះ ការព្យាករណ៍សម្រាប់ឆ្នាំ២០២៤ កំណើនសេដ្ឋកិច្ចសកលក៏អាចនឹងធ្លាក់ក្រោម ៣,៨% ជាចំណុចទាបជាងកំណើនសេដ្ឋកិច្ចមធ្យម និងបញ្ជាក់ទៀតថា កំណើននៃស្ទើរគ្រប់វិស័យនឹងនៅតែមានសភាពទន់ខ្សោយ។ នេះបើតាមសម្ដីរបស់មេធំ IMF និយាយនៅវេទិកា China Development Forum។
សូមជម្រាបដែរថា IMF ធ្លាប់បានព្យាករកន្លងទៅថា កំណើនសេដ្ឋកិច្ចឆ្នាំនេះអាចមានត្រឹម ២,៩% ប៉ុន្តែពួកគេនឹងបញ្ចេញការព្យាករណ៍ថ្មីមួយទៀតនាខែក្រោយ៕
