គណបក្សប្រឆាំងធំៗរបស់ថៃ កំពុងអំពាវនាវឲ្យនាយករដ្ឋមន្ត្រី ចុះចេញពីតំណែង

គណបក្ស Palang Pracharath ដែលជាគណបក្សគាំទ្រដោយយោធារបស់ប្រទេសថៃ បានអំពាវនាវឲ្យលោកស្រី Paetongtarn Shinawatra ចុះចេញពីតំណែងជានាយករដ្ឋមន្ត្រី បន្ទាប់ពីមានការបែកធ្លាយកិច្ច​សន្ទនា​តាមទូរស័ព្ទរវាងលោកស្រី និងអតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន។ នេះបើតាមការចុះផ្សាយពីសារព័ត៌មាន AFP។

គណបក្ស Palang Pracharath ដែលដឹកនាំដោយអតីតមេទ័ពខ្លាំងរបស់ថៃ លោក Prawit Wongsuwan នៅថ្ងៃទី១៩ ខែមិថុនានេះ បានអំពាវនាវលោកស្រី Paetongtarn Shinawatra លាលែងពីតំណែង បន្ទាប់ពីខ្លឹមសារមួយចំនួននៃកិច្ចសន្ទនាតាមរយ:ទូរស័ព្ទរវាងលោកស្រី និងប្រធានព្រឹទ្ធសភាកម្ពុជា សម្តេចតេជោ ហ៊ុន សែន ត្រូវបានបែកធ្លាយ កាលពីពេលថ្មីៗនេះ។

គណបក្សនេះ បាននិយាយទៀតថា អ្វីដែលលោកស្រី Paetongtarn បាននិយាយនៅក្នុងការហៅទូរស័ព្ទខាងលើ គឺជាការបង្ហាញពីកង្វះបទពិសោធ និងសមត្ថភាព ក្នុងការដោះស្រាយបញ្ហាសន្តិសុខរបស់ប្រទេស នឹងថែមទាំងបានព្រមានទៀតថា វាអាចនាំប្រទេសទៅកាន់ស្ថានភាពកាន់តែអាក្រក់ និងទន់ខ្សោយ។

គួរឲ្យដឹងថា លោក Prawit ធ្លាប់បានបម្រើការជាមេបញ្ជាការកងទ័ពថៃ នៅដើមទសវត្សឆ្នាំ២០០០។ ហើយលោក ក៏ត្រូវបានគេចាត់ទុកថាជាមនុស្សម្នាក់ក្នុងចំណោមមនុស្សផ្សេងទៀត ដែលនៅពីក្រោយការធ្វើរដ្ឋប្រហារឆ្នាំ២០១៤ ដែលបានទម្លាក់អតីតនាយករដ្ឋមន្ត្រី លោកស្រី Yingluck Shinawatra ដែលជាម្តាយមីងរបស់លោកស្រី Paetongtarn ។

ក្រោយមកលោក Prawit បានងាកមកដឹកនាំ Palang Pracharath ដែលជាប្រឆាំងដ៏ធំបំផុតមួយ ហើយថែមទាំងបានធ្វើឲ្យលោកក្លាយជាឥស្សរជនដ៏មានឥទ្ធិពលបំផុតមួយក្នុងប្រទេស ផងដែរ ដោយសារតែមានការគាំទ្រយ៉ាងខ្លាំង ពីសំណាក់យោធា។

ទន្ទឹមនឹងនេះ គណបក្សប្រឆាំងមួយទៀត គឺ Thai Sang Thai ក៏បានអំពាវនាវឲ្យលោកស្រី Paethongtarn លាលែងពីតំណែងផងដែរ ដោយនិយាយថា ការហៅទូរស័ព្ទជាមួយសម្តេចតេជោ ហ៊ុន សែន បានធ្វើឲ្យខូចដល់យោធា និងអធិបតេយ្យភាពរបស់ប្រទេស។

ដោយឡែក លោក Natthaphong Ruengpanyawut ប្រធានគណបក្សប្រជាជន ក៏បានអំពាវនាវឲ្យលោកស្រី Paethongtarn ធ្វើការរំលាយសភា ដើម្បីប្រគល់អំណាចជូនប្រជាពលរដ្ឋ និងទប់ស្កាត់ក្រុមមួយចំនួនពីការទាញយកផលប្រយោជន៍ពីកំហុសរបស់នាយករដ្ឋមន្ត្រី ដែលអាចធ្វើឲ្យខូចដល់ស្ថាប័នប្រជាធិបតេយ្យយ៉ាងធ្ងន់ធ្ងរ៕