យោងតាមមន្ត្រីចារកម្មអ៊ីស្រាអែល បានឲ្យដឹងថា អត្រាស្ទាក់ចាប់នៃប្រព័ន្ធខែលការពារដែនអាកាសរបស់ប្រទេសនេះបានធ្លាក់ចុះយ៉ាងខ្លាំង ដោយអាចស្ទាក់ចាប់បានត្រឹមតែ ៦៥% ប៉ុណ្ណោះ ពីការវាយឆ្មក់របស់អ៊ីរ៉ង់ កាលពីថ្ងៃទី១៩ ខែមិថុនា។
តាមការចុះផ្សាយពីសារព័ត៌មាន NBC Newsបានដកស្រង់សម្តីរបស់មន្ត្រីស៊ើបការណ៍សម្ងាត់អ៊ីស្រាអែលជាន់ខ្ពស់ដែលមិនបានបញ្ចេញឈ្មោះ ដោយបាននិយាយថា ខែលការពារដែនអាកាសរបស់ប្រទេស អាចស្ទាក់ចាប់បានតែ ៦៥% ប៉ុណ្ណោះ នៃមីស៊ីលរបស់អ៊ីរ៉ង់ នៅក្នុងការវាយប្រហារថ្ងៃទី១៩ ខែមិថុនា បើធៀបទៅនឹង ៩០% កាលពីមួយថ្ងៃមុន។
មន្ត្រីអ៊ីស្រាអែលដែលធ្លាប់កាន់តំណែងចារកម្មកំពូលរបស់រដ្ឋាភិបាលរូបនេះ បានបង្ហាញឲ្យដឹងទៀតថា អ៊ីរ៉ង់នៅតែមានកាំជ្រួចទំនើបៗខ្លាំង ហើយកំពុងប្រើប្រាស់វា ដើម្បីវាយប្រហារមកលើអ៊ីស្រាអែល។
គួរឲ្យដឹងថាកាំជ្រួចរបស់អ៊ីរ៉ង់ ដែលទើបនឹងបាញ់បង្ហោះថ្មីៗនេះ ត្រូវបានបំពាក់ដោយប្រព័ន្ធកែតម្រូវ និងកំណត់គោលដៅរបស់ស្ថានីយ ដែលបង្កើនភាពត្រឹមត្រូវរបស់វា អំឡុងពេលហោះហើរទៅកាន់គោលដៅ។ កាំជ្រួចទាំងនោះក៏មានល្បឿនលឿនផងដែរ ដែលធ្វើឲ្យប្រព័ន្ធការពារដែនអាកាសអ៊ីស្រាអែល មានពេលតិចក្នុងការប្រតិកម្ម។
ទន្ទឹមនឹងនេះមន្ត្រីអ៊ីស្រាអែល បានសារភាពថា ពីមុនយើងបានទទួលការព្រមានប្រហែលពី ១០-១១នាទី មុនពេលមីស៊ីលវាយប្រហារគោលដៅ។ តែទោះជាយ៉ាងណាក៏ដោយ នៅក្នុងការវាយប្រហារថ្ងៃទី១៩ ខែមិថុនាកន្លងទៅ មីស៊ីលអ៊ីរ៉ង់ចំណាយពេលត្រឹមតែ ៦-៧នាទីប៉ុណ្ណោះដើម្បីទៅដល់គោលដៅរបស់ពួកគេ ដែលលឿនជាងគ្រាប់មុនៗ។
យោងតាមអ្នកជំនាញមួយចំនួនជឿថា អ៊ីរ៉ង់បានប្រើប្រាស់មីស៊ីលផ្លោងចាស់ៗមួយចំនួនធំ បាញ់ចូលនៅក្នុងវាយឆ្មក់លើកដំបូង ដើម្បីធ្វើឲ្យប្រព័ន្ធការពារដែនអាកាសរបស់សត្រូវចុះខ្សោយ ហើយបន្ទាប់មកពួកគេបានប្តូរទៅប្រើអាវុធទំនើបៗដែលមានសមត្ថភាពវាយលុកបានប្រសើរជាងមុន។
ក្រុមអ្នកជំនាញ ក៏បានព្រមានផងដែរថា បើសង្គ្រាមនៅតែបន្តអូសបន្លាយនៅក្នុងកម្រិតខ្លាំង ដូចពេលបច្ចុប្បន្ននេះ អ៊ីស្រាអែល គឺមិនអាចទៅរួចជាមួយអឺរ៉ង់នោះឡើយ។ យោងតាម Marker ដែលជាកាសែតហិរញ្ញវត្ថុឈានមុខគេរបស់អ៊ីស្រាអែល បានរាយការណ៍ថា ប្រព័ន្ធស្ទាក់ចាប់មីស៊ីល បានធ្វើឲ្យប្រទេសនេះ ត្រូវចាយលុយរហូតដល់ទៅ ២៨៥លានដុល្លារឯណោះ ក្នុងមួយយប់៕
