វិស័យឯកជនរបស់ប្រទេសថៃ កំពុងជំរុញឲ្យមានដំណោះស្រាយឆាប់រហ័ស និងដោយសន្តិវិធីចំពោះភាពតានតឹងលើបញ្ហាព្រំដែនកម្ពុជា-ថៃ ដោយព្រមានថាការពន្យារពេលកំពុងធ្វើឲ្យមានផលប៉ះពាល់យ៉ាងខ្លាំងដល់សេដ្ឋកិច្ចក្នុងស្រុក ជាពិសេសលើការនាំចេញផ្លែឈើ។ នេះបើតាមការចុះផ្សាយពីសារព័ត៌មាន Bangkok Post។
យោងតាមលោកស្រី Wipa Sunate ប្រធានសភាពាណិជ្ជកម្មខេត្តត្រាត បាននិយាយកាលពីសប្តាហ៍ចុងមុនថាថា ខេត្តត្រាតដែលស្ថិតនៅភាគខាងកើតនៃប្រទេសថៃ បានរងនូវការធ្លាក់ចុះយ់ាងខ្លាំងនូវទំនុកចិត្តរបស់វិនិយោគិត ហើយកំពុងប្រឈមមុខទៅនឹងការធ្លាក់ចុះនៃសេដ្ឋកិច្ច ផងដែរ។
លោកស្រី Wipa បានបន្ថែមទៀតថា ការនាំមចេញទំនិញរបស់ខេត្តត្រាតមកាន់កម្ពុជា មានតម្លៃដលល់ទៅ ៣០ពាន់លានបាត ខណ:ការនាំចូលពីកម្ពុជាវិញ មានតម្លៃចន្លោះពី ៣ទៅ៤ពាន់លានបាត។ ប៉ុន្តែទោះជាយ៉ាងណាក៏ដោយ ទំហំពាណិជ្ជកម្មនេះ កំពុងប្រឈមនឹងការធ្លាក់ចុះ ដោយសារតែអស្ថិរភាពនយោបាយ និងការរឹតបន្តឹងលើម៉ោងប្រតិបត្តិការនៅតាមព្រំដែន។
លោកស្រីបានបន្តទៀតថា ការធ្លាក់ចុះនៃលំហូរផលិតផល និងការលក់ នឹងប៉ះពាល់យ៉ាងខ្លាំងដល់អាជីវកម្ម និងផលិតកម្មបន្ថែមទៀត ហើយប្រសិនបើច្រកព្រំដែនត្រូវបិទជាអចិន្រ្តៃយ៍ នោះផលវិបាកនឹងកាន់តែធ្ងន់ធ្ងរ។
ជាមួយគ្នានេះ វិស័យទេសចរណ៍ក៏រងផលប៉ះពាល់ដែរ ខណៈអ្នកធ្វើដំណើរប្រឈមនឹងការរឹតត្បិតចូលមកកម្ពុជា។ លោកស្រី Wipa បន្តទៀតថា សភាគ្រោងនឹងលើកបញ្ហាទាំងនេះជាមួយសភាពាណិជ្ជកម្មថៃ ដើម្បីជំរុញឲ្យរដ្ឋាភិបាលចាត់វិធានការទប់ស្កាត់ ឲ្យបានឆាប់រហ័សជាទីបំផុត។
ទន្ទឹមនឹងនេះ ប្រធានបណ្តាញសហករណ៍កសិកម្មខេត្តត្រាត លោក Wutthiphong Rattamon បានមានប្រសាសន៍ថា ផ្លែមង្ឃុតប្រហែល ៥ ម៉ឺនតោនត្រូវបានគេរំពឹងថានឹងត្រូវចែកចាយនៅឆ្នាំនេះ។ លោកបានបន្តថា ការហាមប្រាមរបស់កម្ពុជាលើកសិផលថៃ បានធ្វើឲ្យលោកមានការព្រួយបារម្ភ បើទោះជាទីផ្សារកម្ពុជា មានត្រឹមតែ ៥% ទៅ ១០% នៃការនាំចេញផ្លែមង្ឃុតរបស់ថៃក៏ដោយ។
គួរជម្រាបជូនថា យោងតាមរដ្ឋមន្ត្រីក្រសួងពាណិជ្ជកម្មថៃ លោក Pichai Naripthaphan បានណែនាំឲ្យនាយកដ្ឋានពាណិជ្ជកម្មបរទេស ដាក់ចេញវិធានការឆ្លើយតបភ្លាមៗ ជុំវិញបញ្ហានេះ ដោយបន្តថា ក្រសួងក៏មានគោលបំណងការពារកសិករថៃ និងរក្សាស្ថិរភាពតម្លៃក្នុងស្រុក ដែលអាចនឹងរងផលប៉ះពាល់ ដោយសាររឹតត្បិតរបស់កម្ពុជា ផងដែរ៕
