ឧបនាយករដ្ឋមន្ត្រី និងជារដ្ឋមន្ត្រីក្រសួងដឹកជញ្ជូន លោក Suriya Jungrungreangkit ត្រូវបានតែងតាំងឲ្យកាន់តួនាទីជានាយករដ្ឋមន្ត្រីស្តីទីជំនួសលោកស្រី Paetongtarn Shinawatra ដែលត្រូវបានតុលាការធម្មនុញ្ញសម្រេចព្យួរតំណែង នៅថ្ងៃទី១ ខែកក្កដានេះ។ នេះបើតាមការចុះផ្សាយពីសារព័ត៌មាន The Nation។
ជុំវិញការសម្រេចជ្រើសរើសនាយករដ្ឋមន្ត្រីស្តីទីថ្មីនេះ ត្រូវបានធ្វើឡើង បន្ទាប់ពីតុលាការធម្មនុញ្ញ សម្រេចទទួលយកញត្តិ ពីសមាជិកព្រឹទ្ធសភាជុំវិញការស្នើឲ្យដកតំណែងលោកស្រី Paetontarn ពីនាយករដ្ឋមន្ត្រី ក្រោមការចោទប្រកាន់ពិបទបំពានក្រមសីលធម៌ ក្រោយបែកធ្លាយការសន្ទនាតាមទូរស័ព្ទជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។
ប្រភពខាងលើ បានបន្ថែមទៀតថា អគ្គលេខាធិការនៃគណៈរដ្ឋមន្ត្រីបានសម្តែងការព្រួយបារម្ភចំពោះស្ថានភាពដែលមិនធ្លាប់មានពីមុន ដោយសារតែវានឹងក្លាយជាលើកទីមួយក្នុងប្រវត្តិសាស្ត្ររបស់ប្រទេសថៃ ដែលនាយករដ្ឋមន្ត្រីមួយរូបត្រូវបានព្យួរពីតួនាទី ខណៈពេលដែលគណៈរដ្ឋមន្ត្រីថ្មីត្រៀមនឹងស្បថចូលកាន់តំណែង។
គួរឲ្យដឹងផងដែរថា ប្រការនេះតម្រូវឲ្យយនាយករដ្ឋមន្ត្រីស្តីទី ដឹកនាំគណៈរដ្ឋមន្ត្រីថ្មីស្បថចូលកាន់តំណែង នៅថ្ងៃទី៣ ខែកក្កដា ឆ្នាំ២០២៥ ជំនួសនាយករដ្ឋមន្ត្រីដែលត្រូវបានព្យួរ។
ជម្រាបជូនថា ជុំវិញការព្យួរតំណែងនេះតុលាការធម្មនុញ្ញថៃនឹងត្រូវចេញសាលក្រមសម្រេចថាតើត្រូវដក ឬក៏ប្រគល់តំណែងជានាយករដ្ឋមន្ត្រីឲ្យលោកស្រី Paetongtarn វិញ ហើយការចេញសាលក្រមអាចចំណាយពេលច្រើនខែ ឬលឿនជាងរំពឹងទុក៕
