អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា បានស្នើឲ្យប្រទេសថៃ បង្កើតគម្រោងទិដ្ឋាការមាស សម្រាប់ផ្តល់ជូនជនបរទេសដែលមានទ្រព្យសម្បត្តិច្រើន ដើម្បីអាចបន្តស្នាក់នៅក្នុងប្រទេសរយ:ពេលវែង។ នេះបើតាមការចុះផ្សាយពីសារព័ត៌មាន Bangkok Post។
ក្នុងអំឡុងពេលនិយាយនៅឯសន្និសីទ “Unlocking Thailand’s Future” ដែលរៀបចំដោយក្រុមហ៊ុន Mcot Plc កាលពីថ្ងៃព្រហស្បតិ៍ លោក ថាក់ស៊ីន បានលើកឡើងថា គម្រោងទិដ្ឋាការមាសនេះ អាចផ្តល់ប្រាក់ចំណូលដល់សេដ្ឋកិច្ចរហូតដល់ទៅ ៥០០ពាន់លានបាត។ លោកបន្ថែមទៀតថា គម្រោងនេះ អាចជួយឲ្យប្រទេសថៃ ទាក់ទាញអ្នកមានៗចំនួន ៦០០ ០០០ នាក់ ក្នុងការដាក់ប្រាក់រាប់លាន សម្រាប់ទទួលបានទិដ្ឋាការនេះ។
លោក ថាក់ស៊ីន ក៏បាននិយាយទៀតថា ជុំវិញគម្រោងដាក់ចេញទិដ្ឋាការមាសនេះ នឹងអាចជំរុញកំណើន GDP របស់ប្រទេសថៃ កាត់បន្ថយបំណុលសាធារណ: និងជំរុញដល់ការប្រើប្រាស់នៅក្នុងស្រុក ថែមទៀតផង។
គួរឲ្យដឹងផងដែរថា លោក ថាក់ស៊ីន នៅតែបន្តរក្សាបាននូវឥទ្ធិពលយ៉ាងសំខាន់មួយក្នុងនាមជាអ្នកបង្កើតគោលនយោបាយតាមរយ:គណបក្សភឿថៃដែលកំពុងកាន់អំណាច ដែលដឹកនាំដោយកូនស្រីពៅរបស់លោក គឺលោកស្រី Paetongtarn បើទោះបីជាលោកស្រីមិនមានឋានៈផ្លូវការ ក្នុងរដ្ឋាភិបាលបច្ចុប្បន្នក៏ដោយ។
ជម្រាបជូនថា សុន្ទរកថារបស់លោក ថាក់ស៊ីន អំពីការស្នើឲ្យបង្កើតគម្រោងទិដ្ឋាការថ្មីនេះ ត្រូវបានធ្វើឡើង បន្ទាប់ពីតុលាការធម្មនុញ្ញថ្មីៗនេះ បានសម្រេចព្យួរតំណែងលោកស្រី Paetongtarn ពីនាយករដ្ឋមន្ត្រី ចំពេលមានការស៊ើបអង្កេតលើករណីរំលោភបំពានលើក្រមសីលធម៌ដែលត្រូវបានចោទប្រកាន់ពាក់ព័ន្ធនឹងការដោះស្រាយជម្លោះព្រំដែន៕
