យោងតាមការជូនដំណឹងចុងក្រោយមួយដែលចេញដោយក្រសួងពាណិជ្ជកម្មរបស់ប្រទេស បានឲ្យដឹងថា ប្រទេសចិន នឹងចាប់ផ្តើមពង្រឹងលើការត្រួតពិនិត្យការនាំចេញរថយន្តដែលប្រើប្រាស់រួច និងរថយន្តថ្មីៗទាំងអស់ក្រោមរូបភាពជារថយន្តដែលប្រើប្រាស់រួច។ នេះបើតាមការចុះផ្សាយពីសារព័ត៌មាន Reuters។
ក្រសួងបានបញ្ជាក់បន្ថែមទៀតថា ចាប់ពីដើមឆ្នាំក្រោយទៅ រថយន្តដែលដាក់ពាក្យស្នើសុំនាំចេញតិចជាង ១៨០ថ្ងៃបន្ទាប់ពីពួកគេត្រូវបានចុះបញ្ជី នឹងតម្រូវឲ្យដាក់ពាក្យស្នើព័ត៌មានបន្ថែមទៀត សម្រាប់សេវាថែទាំនៅក្រោយពេលលក់។
មិនតែប៉ុណ្ណោះ អាជ្ញាធរពាណិជ្ជកម្មក្នុងស្រុកបាននិយាយទៀតថា ក្រុមហ៊ុននាំចេញរថយន្តដែលប្រើប្រាស់រួច ក៏នឹងត្រូវបានត្រួតពិនិត្យយ៉ាងដិតដល់ផងដែរ ចំពោះអាកប្បកិរិយាមិនឈ្មោះត្រង់ ឬការខកខាន ក្នុងការផ្តល់កាតព្វកិច្ចធានាលើគុណភាព។
គួរឲ្យដឹងផងដែរថា កាលពីខែមិថុនា សារព័ត៌មាន Reuters បានរាយការណ៍ថា ឧស្សាហកម្មរថយន្តរបស់ប្រទេសចិន បានបំប៉ោងការលក់រថយន្តអស់រយៈពេលជាច្រើនឆ្នាំមកហើយ តាមរយៈទីផ្សារងងឹតដែលចុះបញ្ជីរថយន្តថ្មីៗ ពីខ្សែសង្វាក់ផលិតកម្ម ហើយបន្ទាប់មកដឹកជញ្ជូនវាទៅក្រៅប្រទេសក្នុងូបភាពជារថយន្តប្រើប្រាស់រួច ជំនួសវិញ។
ជម្រាបជូនផងដែរថា នៅក្នុងខែមិថុនាដដែលនោះ ប្រធានក្រុមហ៊ុនផលិតរថយន្តចិន Changan បានអំពាវនាវឱ្យមានការបង្ក្រាបលើការនាំចេញរថយន្តដែលបានប្រើប្រាស់រួចដែលមានចំងាយសូន្យម៉ាយ ដោយនិយាយថា ការអនុវត្តនេះអាចធ្វើឱ្យខូចរូបភាពម៉ាកយីហោចិនយ៉ាងខ្លាំង នៅបរទេស៕
