ប្រធានាធិបតីអាមេរិក លោក ដូណាល់ ត្រាំ ថ្មីៗនេះ បាននិយាយថា ពាក្យដែលលោកចូលចិត្តខ្លាំងជាងបំផុតនោះគឺ ពន្ធគយ ហើយគោលនយោបាយពន្ធគយរបស់រដ្ឋបាលលោក បាននាំមកនូវប្រាក់ចំណូលរាប់រយពាន់លានដុល្លារ ដល់សហរដ្ឋអាមេរិក។ នេះបើតាមការចុះផ្សាយពីសារព័ត៌មាន Business Insider។
ដោយបានថ្លែងទៅកាន់ព្រឹត្តិការណ៍មួយនៅទីក្រុង Mount Pocono រដ្ឋ Pennsylvania កាលពីថ្ងៃទី៩ ខែធ្នូ លោក ត្រាំ បាននិយាយថា ៖”ខ្ញូំចូលចិត្តពាក់ ពន្ធ ច្រើនជាងពាក្យផ្សេងណាៗទាំងអស់ នៅក្នុងវចនានុក្រម”។
មិនតែប៉ុណ្ណោះ មេដឹកនាំសេតវិមានរូបនេះ ក៏បានសង្កត់ធ្ងន់ទៀតផងដែរថា វិធានការពន្ធគយរបស់លោកដែលបានដាក់ចេញនាពេលកន្លងមក បានទាក់ទាញក្រុមហ៊ុនជាច្រើនឲ្យត្រលប់មកសហរដ្ឋអាមេរិកវិញ។
លោក ត្រាំ បាននិយាយថា ៖”ពន្ធបាននាំមកយើងនូវទឹកប្រាក់រាប់រយពាន់លានដុល្លារ។ ហើយក្រុមហ៊ុនដែកថែបជាច្រើនកំពុងសម្រុកទៅរដ្ឋ Pennsylvania ពីព្រោះពួកគេមិនចង់បង់ពន្ធ ២៥% , ៥០% និងអាចដល់ ១០០% នោះឡើយ។ បើគ្មានពន្ធទេ យើងនឹងមិនមានរោងចក្រផលិតដែកថែបនៅគ្រប់ទីកន្លែងនៅក្នុងសហរដ្ឋអាមេរិកនោះឡើយ។ ហើយវាពិតជាអាក្រក់ណាស់សម្រាប់សន្តិជាតិ”។
ជម្រាបជូនផងដែរថា កាលពីខែមេសា លោក ត្រាំ បានប្រកាសដាក់ពន្ធគយចាប់ពី ១០% រហូតដល់ ៤៩% លើកការនាំចូលពីប្រទេស និងដែនដីសរុបចំនួន ១៨៥ ដោយក្នុងនោះពន្ធគយទូទៅ ១០% ត្រូវបានចូលជាធរមាន នៅថ្ងៃទី៥ ខែមេសា ខណៈពេលដែលពន្ធជាក់លាក់សម្រាប់ប្រទេសនីមួយៗ បានចូលជាធរមាននៅថ្ងៃទី៩ ខែមេសា៕
