ប្រទេសឥណ្ឌូណេស៊ី និងនូវែលហ្សេឡង់ ថ្មីៗនេះ បានបង្ហាញពីគោលបំណងជំរុញពាណិជ្ជកម្មទ្វេភាគី ឲ្យដល់ចំនួន ៣,៦ពាន់លានដុល្លារ នៅក្នុងឆ្នាំ២០២៩ ខាងមុខ។ នេះបើតាមការចុះផ្សាយពីសារព័ត៌មាន Antara News។
រដ្ឋមន្ត្រីសម្របសម្រួលកិច្ចការសេដ្ឋកិច្ចឥណ្ឌូណេស៊ី លោក Airlangga Hartarto បាននិយាយកាលពីថ្ងៃទី៨ ខែសីហាកន្លងទៅថា កិច្ចសហប្រតិបត្តិការនេះ ត្រូវបានគូសបញ្ជាក់ នៅក្នុងផែនការសកម្មភាពដៃគូគ្រប់ជ្រុងជ្រោយឥណ្ឌូណេស៊ី-នូវែលហ្សេឡង់ ឆ្នាំ២០២៥-២០២៩។
លោក Hartarto បានបញ្ជាក់ទៀតថា កិច្ចសហប្រតិបត្តិការពាណិជ្ជកម្មស្ថិតនៅក្នុងចំណោមប្រធានបទដែលបានពិភាក្សាជាមួយរដ្ឋមន្ត្រីពាណិជ្ជកម្ម និងការវិនិយោគនូវែលហ្សេឡង់ លោក Todd McClay ក្នុងអំឡុងកិច្ចប្រជុំនាពេលថ្មីៗនេះ។
ក្នុងអំឡុងកិច្ចប្រជុំនោះ រដ្ឋមន្ត្រីប្រទេសទាំងពីរ បានលើកឡើងពីសារៈសំខាន់នៃការដោះស្រាយបញ្ហាជុំវិញផលិតផលសាកវប្បកម្ម សត្វ និងការនាំចូលផលិតផលសត្វ ដែលបច្ចុប្បន្នកំពុងត្រូវបានដោះស្រាយនៅអង្គការពាណិជ្ជកម្មពិភពលោក (WTO)។
លោក Hartarto បានបន្ថែមថា តាមរយៈការដោះស្រាយបញ្ហាទាំងនេះ ឥណ្ឌូណេស៊ី និងនូវែលសេឡង់អាចផ្តោតលើគំនិតផ្តួចផ្តើមយុទ្ធសាស្ត្រផ្សេងទៀត ដែលអនុញ្ញាតឲ្យមានកិច្ចសហប្រតិបត្តិការសេដ្ឋកិច្ចកាន់តែប្រសើរឡើង រវាងប្រទេសទាំងពីរ។
ជម្រាបជូនថា ពាណិជ្ជកម្មសរុបរវាងប្រទេសទាំងពីរក្នុងឆមាសទីមួយនៃឆ្នាំ ២០២៥នេះ សម្រេចបាន ៩៦៣,២លានដុល្លារអាមេរិក កើនឡើង ២១,៥% បើធៀបនឹងចំនួន ៧៩២,៣លានដុល្លារ ក្នុងរយៈពេលដូចគ្នាកាលពីឆ្នាំមុន។ ក្នុងចំនួននេះ ការនាំចេញរបស់ឥណ្ឌូណេស៊ីទៅនូវែលហ្សេឡង់ មានចំនួនសរុប ៣៧៤,៨លានដុល្លារ ខណៈការនាំចូលមានចំនួន ៥៨៨,៣លានដុល្លារ៕
