មហាសេដ្ឋីលំដាប់កំពូល Bill Gates បានបញ្ចប់ការផ្ទេរប្រាក់ដ៏ច្រើនចំនួនប្រមាណ ៧,៨៨ពាន់លានដុល្លារ ទៅកាន់មូលនិធិសប្បុរសធម៌ឯកជនរបស់អតីតភរិយារបស់លោក គឺលោកស្រី Melinda Gates ដើម្បីដោះស្រាយបណ្តឹងលែងលះដ៏ធំបំផុតមួយដែលធ្លាប់មាន។
យោងតាមឯកសារពន្ធដែលទើបចេញផ្សាយថ្មី ហើយត្រូវបានពិនិត្យដោយកាសែត New York Times ក្នុងខែមករា ឆ្នាំ២០២៦ បានបង្ហាញឲ្យដឹងថា ការបរិច្ចាគនេះត្រូវបានធ្វើឡើង តាំងពីឆ្នាំ២០២៤ មកម្លេះ ដល់មូលនិធិ Pivotal Philanthropies ដែលជាអង្គការមិនស្វែងរកប្រាក់ចំណេញបង្កើតឡើងដោយលោកស្រី Melinda។
ហើយមិនតែប៉ុណ្ណោះ ចំពោះការបរិច្ចាគនេះផងដែរ ត្រូវបានធ្វើឡើង ដើម្បីជាការដោះស្រាយបណ្តឹងលែងលះ នៅក្នុងឆ្នាំ២០២១ របស់គូស្វាមីភរិយានេះ បន្ទាប់ពីការសម្រេចចិត្តរបស់ពួកគេក្នុងការបើកដំណើរការអង្គការសប្បុរសធម៌ឯករាជ្យ។
ជម្រាបជូនថា ការដោះស្រាយនេះ ក៏មានពាក់ព័ន្ធនឹងការបែងចែកទ្រព្យសម្បត្តិផ្ទាល់ខ្លួនយ៉ាងច្រើនផងដែរ រួមទាំងអចលនទ្រព្យដែលមានតម្លៃជាង ១៧០លានដុល្លារ ការប្រមូលស្នាដៃសិល្បៈចំនួន ១៣០លានដុល្លារ និងភាគហ៊ុនសំខាន់ៗរបស់ Microsoft។ បើយោងតាម Forbes បានប៉ាន់ប្រមាណថា ការផ្ទេរទាំងនេះបានធ្វើឱ្យលោកស្រី Melinda មានទ្រព្យសម្បត្តិសរុបប្រហែល ២៥ពាន់លានដុល្លារ៕
