គ្រួសារមហាសេដ្ឋីដែលនៅពីក្រោយក្រុមហ៊ុនផលិតគ្រឿងបន្លាស់រថយន្តធំជាងគេរបស់ប្រទេសថៃ Thai Summit Group កំពុងពិចារណាលើជម្រើសក្នុងការលក់ក្រុមហ៊ុននេះ នៅក្នុងតម្លៃរហូតដល់ទៅ ២ពាន់លានដុល្លារ។
យោងតាមសារព័ត៌មាន Bloomberg បានរាយការណ៍ថា មានធនាគារវិនិយោគសកលជាច្រើន ថ្មីៗនេះ បានបន្តដាក់សំណើជូណក្រុមគ្រួសារ Juangroongruangkit ទាក់ទងនឹងការផ្តល់តម្លៃទិញអាជីវកម្មចន្លោះពី ១,៥ពាន់លានដុល្លារ ទៅ ២ពាន់លានដុល្លារ។
Juangroongruangkit ដែលជាគ្រួសារស្ថាបនិក និងបានអភិវឌ្ឍក្រុមហ៊ុននេះទៅជាមូលដ្ឋានគ្រឹះនៃឧស្សាហកម្មរថយន្តរបស់ប្រទេសថៃអស់រយៈពេលជាច្រើនទសវត្សមកហើយនោះ បានប្រឈមមុខទៅនឹងឧបសគ្គក្នុងការស្វែងរកអ្នកជំនួសតំណែងដ៏ស័ក្តិសម បន្ទាប់ពីស្ថាបនិកលោក Pattana Juangroongruangkit បានទទួលមរណភាពក្នុងឆ្នាំ២០២២។
គួរឲ្យដឹងថា ក្រុមហ៊ុន Thai Summit រកចំណូលបានជាង ២៥០លានដុល្លារ មុនបង់ការប្រាក់ ពន្ធ ការរំលោះ និងការកាត់កងលើប្រាក់ចំណូលប្រចាំឆ្នាំ ដោយមានបុគ្គលិកសរុបជាង ២០ ០០០ នាក់នៅទូទាំងប្រទេស។ មិនតែប៉ុណ្ណោះ ក្រុមហ៊ុននេះ ក៏បានបើកដំណើរការរោងចក្រនៅក្រៅប្រទេសផងដែរ ដូចជាប្រទេសចិន ជប៉ុន និងឥណ្ឌា។
ជម្រាបជូនថា ការលក់រថយន្តរបស់ប្រទេសថៃបានកើនឡើងដល់កម្រិតខ្ពស់បំផុតក្នុងរយៈពេលពីរឆ្នាំចុងក្រោយ នៅឆ្នាំ២០២៥ ដែលជំរុញដោយរថយន្តអគ្គិសនី ដែលមានចំនួន ៤៥% នៃការលក់សរុប៕
