រដ្ឋមន្ត្រីក្រសួងថាមពលសហរដ្ឋអាមេរិក លោក Chris Wright កាលពីពេលថ្មីៗនេះ បានបង្ហាញការជឿជាក់ថាតម្លៃប្រេងពិភពលោក មិនអាចហក់ឡើងដល់ ២០០ដុល្លារក្នុងមួយបារ៉ែលបាននោះឡើយ។ នេះបើតាមការចេញផ្សាយពីសារព័ត៎មាន។ Reuters។
លោក Wright បានមាននិយាយនៅថ្ងៃទី១២ ខែមីនា ដោយឆ្លើយតបទៅនឹងសេចក្តីថ្លែងការណ៍របស់អ៊ីរ៉ង់ថា ៖”ខ្ញុំចង់និយាយថាវាមិនអាចទៅរួចទេ។ ប៉ុន្តែយើងកំពុងផ្តោតលើយុទ្ធនាការយោធា និងការដោះស្រាយបញ្ហានោះ”។
គួររំឮកផងដែរថា លោក Ebrahim Zolfaqari អ្នកនាំពាក្យនៃបញ្ជាការយោធាអ៊ីរ៉ង់ បានព្រមានពិភពលោកឲ្យត្រៀមខ្លួនសម្រាប់តម្លៃប្រេងឡើងដល់ ២០០ដុល្លារក្នុងមួយបារ៉ែល ប្រសិនបើការប្រយុទ្ធគ្នាកាន់តែធ្ងន់ធ្ងរឡើង។
មិនតែប៉ុណ្ណោះ លោក Wright បានប្រាប់ CNN ទៀតថា ៖”យើងកំពុងស្ថិតក្នុងដំណាក់កាលនៃការរំខានរយៈពេលខ្លី ដើម្បីធានាបាននូវលំហូរថាមពលរយៈពេលវែង”។ រដ្ឋមន្ត្រីរូបនេះ ថែមទាំងបានសង្កត់ធ្ងន់ទៀតថា រដ្ឋបាលរបស់លោក ត្រាំ កំពុងផ្តោតលើដំណោះស្រាយជាក់ស្តែង ដើម្បីឆ្លងឲ្យផុតនៃការរំខានការផ្គត់ផ្គង់ថាមពលដ៏តឹងតែងទាំងនេះ។
ជម្រាបជូនថា តម្លៃប្រេងពិភពលោកបានកើនឡើងជាង ៩% គិតនៅថ្ងៃទី១២ ខែមីនា។ ប្រេងឆៅប្រភេទ Brent បច្ចុប្បន្នកំពុងជួញដូរប្រហែល ១០០ដុល្លារក្នុងមួយបារ៉ែល ខណៈដែលប្រេងឆៅប្រភេទ WTI របស់សហរដ្ឋអាមេរិកមានតម្លៃ ៩៥ដុល្លារ៕
