Samsung Electronics ឥឡូវនេះ បានក្លាយជាក្រុមហ៊ុនទីពីរនៅអាស៊ី បន្ទាប់ពីក្រុមហ៊ុនបន្ទះឈីប TSMC ដែលឈានដល់តម្លៃមូលធនទីផ្សារ ១ទ្រីលានដុល្លារ។ នេះបើតាមការចុះផ្សាយពីសារព័ត៌មាន Reuters។
នៅពេលបើកវគ្គជួញដូរ នៅថ្ងៃទី៦ ខែឧសភា ភាគហ៊ុនរបស់ក្រុមហ៊ុន Samsung Electronics បានកើនឡើង ១២% ដែលជំរុញឲ្យតម្លៃមូលធនទីផ្សាររបស់ពួកគេ កើនឡើងដល់ ១,៦៥ទ្រីលានវ៉ុន (១,១ទ្រីលានដុល្លារ។ ពួកគេគឺជាក្រុមហ៊ុនអាស៊ីទីពីរ បន្ទាប់ពីក្រុមហ៊ុនផលិតបន្ទះឈីប TSMC ដែលឈានដល់តម្លៃទីផ្សារដ៏ខ្ពស់បែបនេះ។
បច្ចុប្បន្នក្រុមហ៊ុន Samsung Electronics គឺជាក្រុមហ៊ុនផលិតបន្ទះឈីបអង្គចងចាំធំជាងគេបំផុតរបស់ពិភពលោក។ ការកើនឡើងនៃតម្រូវការសម្រាប់បន្ទះឈីបដែលប្រើក្នុងបញ្ញាសិប្បនិម្មិតបានជួយឲ្យតម្លៃភាគហ៊ុនរបស់ក្រុមហ៊ុនខ្នាតយក្សកូរ៉េខាងត្បូងមួយនេះ កើនឡើងបួនដង ក្នុងរយៈពេលមួយឆ្នាំកន្លងមក។
គួរជម្រាបជូនថា អាស៊ីគឺជាមូលដ្ឋានគ្រឹះនៃប្រព័ន្ធអេកូឡូស៊ី AI សកល ដោយរួមបញ្ចូលគ្នានូវភាពលេចធ្លោក្នុងការផលិតបន្ទះឈីប ជាមួយនឹងការពង្រីកហេដ្ឋារចនាសម្ព័ន្ធទិន្នន័យ។ ភាគហ៊ុនរបស់ក្រុមហ៊ុន SK Hynix និង TSMC ក៏បានឈានដល់កម្រិតខ្ពស់បំផុតក្នុងខែនេះផងដែរ ខណៈពេលដែលវិនិយោគិន កំពុងដាក់ក្តីរំពឹងកាន់តែច្រើនលើការអភិវឌ្ឍសម្រាប់បន្ទះឈីបទំនើប៕
