មេដឹកនាំក្រុមហ៊ុនខ្នាតយក្សរបស់សហរដ្ឋអាមេរិកច្រើនជាង ១០ រួមទាំងនាយកប្រតិបត្តិក្រុមហ៊ុន Nvidia, Apple, Qualcomm, Citigroup និង Boeing ផងនោះ នឹងអមដំណើរប្រធានាធិបតី លោក ដូណាល់ ត្រាំ ទៅកាន់ប្រទេសចិន នៅសប្តាហ៍ក្រោយ។
នៅថ្ងៃទី៨ ខែឧសភា ទីភ្នាក់ងារសារព័ត៌មាន Reuters ដោយដកស្រង់ប្រភពដែលជិតស្និទ្ធនឹងបញ្ហានេះ បានរាយការណ៍ថា សេតវិមាន និងក្រសួងរតនាគារសហរដ្ឋអាមេរិក កំពុងពិចារណាអញ្ជើញតំណាងមកពីក្រុមហ៊ុនអាជីវកម្មអាមេរិកជាង ១០ ឲ្យអមដំណើរប្រធានាធិបតី ដូណាល់ ត្រាំ ក្នុងដំណើរទស្សនកិច្ចរបស់លោកទៅកាន់ប្រទេសចិននៅសប្តាហ៍ក្រោយ។
យោងតាមសារព័ត៌មាន Semafor បានបង្ហាញឲ្យដឹងទៀតថា នាយកប្រតិបត្តិក្រុមហ៊ុន Nvidia, Apple, Qualcomm, Citigroup និង Boeing ស្ថិតក្នុងចំណោមអ្នកដែលត្រូវបានអញ្ជើញ។ ពួកគេនឹងចូលរួមជាមួយ លោក ត្រាំ នៅក្នុងពិធីទទួលភ្ញៀវដែលរៀបចំដោយប្រធានាធិបតីចិន លោក ស៊ី ជិនពីង។
ជម្រាបជូនថា បើប្រៀបធៀបទៅនឹងមេដឹកនាំប្រទេសលោកខាងលិចដទៃទៀតដែលទើបតែបានទៅទស្សនកិច្ចប្រទេសចិនថ្មីៗនេះ ចំនួនតំណាងធុរកិច្ចអាមេរិកដែលអមដំណើររបស់ប្រធានាធិបតី មានចំនួនតិចជាងគួរឱ្យកត់សម្គាល់។ កាលពីខែមករា នាយករដ្ឋមន្ត្រីអង់គ្លេស លោក Keir Starmer បានទៅទស្សនកិច្ចប្រទេសចិនជាមួយមេដឹកនាំធុរកិច្ច និងវប្បធម៌ចំនួន ៦០ នាក់។ ហើយកាលពីខែកុម្ភៈ អធិការបតីអាល្លឺម៉ង់ លោក Friedrich Merz បានធ្វើដំណើរជាមួយក្រុមហ៊ុនឧស្សាហកម្មយក្សចំនួន ២៩ របស់ប្រទេស៕
