យោងតាមមន្ត្រីអ៊ីរ៉ង់ម្នាក់ បានសង្កត់ធ្ងន់ថា ការបញ្ចេញមូលនិធិបង្កករបស់ប្រទេសខ្លួន គឺជាបញ្ហាសំខាន់ ក្នុងការបើកការចរចាជាមួយសហរដ្ឋអាមេរិក។
លោក Mohsen Rezaei ទីប្រឹក្សាជាន់ខ្ពស់របស់មេដឹកនាំកំពូលអ៊ីរ៉ង់ បានប្រាប់ CNN នៅថ្ងៃទី៥ ខែមិថុនាថា កិច្ចចរចាជាមួយសហរដ្ឋអាមេរិកត្រូវបានជាប់គាំងដោយសារបញ្ហានៃការបញ្ចេញទ្រព្យសម្បត្តិបង្កក។
មិនតែប៉ុណ្ណោះ Rezaei បាននិយាយទៀតថា៖ “ប្រសិនបើប្រធានាធិបតី លោក ដូណាល់ ត្រាំ ចង់ឈានដល់កិច្ចព្រមព្រៀងជាមួយអ៊ីរ៉ង់ ការបង្កកទឹកប្រាក់ចំនួន ២៤ពាន់លានដុល្លារ គឺជាការសាកល្បងទំនុកចិត្តដែលយើងចង់បានពីគាត់។ នេះគឺជាការសាកល្បងដែលសហរដ្ឋអាមេរិកត្រូវតែឆ្លងកាត់ ដើម្បីអាចត្រួសត្រាយផ្លូវទៅមុខទឿត។ នោះជាប្រាក់របស់យើង មិនមែនរបស់អាមេរិកទេ”។
ទីប្រឹក្សាកំពូលរូបនេះ បានព្រមានទៀតថា ទីក្រុងតេអេរ៉ង់ នឹងពង្រីកសង្រ្គាមឲ្យហួសពីរដ្ឋឈូងសមុទ្រ ហើយនឹងនាំជម្លោះទៅរកទិសដៅផ្សេងៗទៀត ប្រសិនបើទីក្រុងវ៉ាស៊ីនតោន នៅតែបន្តជម្លោះរបស់ខ្លួន។
គួរជម្រាបជូនផងដែរថា អ៊ីរ៉ង់ត្រូវបានសហរដ្ឋអាមេរិក និងបណ្តាប្រទេសលោកខាងលិចបង្កកទ្រព្យសម្បត្តិ និងដាក់ទណ្ឌកម្មយ៉ាងទូលំទូលាយ ចាប់តាំងពីមានបដិវត្តន៍អ៊ីស្លាមឆ្នាំ១៩៧៩ មក។ ខណៈពេលដែលមិនមានតួលេខផ្លូវការណាមួយកំណត់លើតម្លៃសរុបនៃទ្រព្យសម្បត្តិអ៊ីរ៉ង់ដែលបង្កក ប្រព័ន្ធផ្សព្វផ្សាយអាមេរិកប៉ាន់ប្រមាណថាតួលេខនេះមានចន្លោះពី ១០០ពាន់លានដុល្លារ ទៅ ១២៣ពាន់លានដុល្លារ៕
