បំណុលគ្រួសាររបស់ប្រទេសម៉ាឡេស៊ី បានកើនឡើងដល់ ១,៧៣ពាន់ពាន់លានរីងហ្គីត (ប្រហែល ៤២៣ពាន់លានដុល្លារអាមេរិក) គិតនៅត្រឹមចុងខែមីនា ទោះបីជាសមាមាត្របំណុលធៀបទៅនឹងផលិតផលក្នុងស្រុកសរុប (GDP) បានធ្លាក់ចុះបន្តិចក៏ដោយ។ នេះបើតាមការចុះផ្សាយពីសារព័ត៌មាន VN Express។
នាយករដ្ឋមន្ត្រីម៉ាឡេស៊ី លោក Anwar Ibrahim ត្រូវបានដកស្រង់សម្តីដោយប្រព័ន្ធផ្សព្វផ្សាយក្នុងស្រុកថា បំណុលគ្រួសារមានចំនួន ៨៤,៤% នៃផលិតផលក្នុងស្រុកសរុប (GDP) នៅចុងត្រីមាសទីមួយ ដែលធ្លាក់ចុះបន្តិចបន្តួចពី ៨៤,៧% កាលពីបីខែមុន។
យ៉ាងណាមិញ យោងតាមការវាយតម្លៃរបស់រដ្ឋាភិបាលម៉ាឡេស៊ី កំណើនបំណុលនៅតែស្ថិតក្នុងជំហានរួមជាមួយនឹងការពង្រីកសេដ្ឋកិច្ច និងការកើនឡើងនៃប្រាក់ចំណូល ដែលបន្ធូរបន្ថយការព្រួយបារម្ភកន្លងមកថា ពលរដ្ឋម៉ាឡេស៊ី នឹងប្រឈមមុខទៅនឹងភាពតានតឹងខ្លាំងឡើងៗ ក្នុងចំណោមភាពមិនប្រាកដប្រជា នៅក្នុងសេដ្ឋកិច្ចពិភពលោក។
ទន្ទឹមនឹងនេះ នៅក្នុងការឆ្លើយតបជាលាយលក្ខណ៍អក្សដាក់ជូនទៅក្នុងសភា លោក Anwar ដែលជារដ្ឋមន្ត្រីក្រសួងហិរញ្ញវត្ថុផងនោះ បាននិយាយថា រដ្ឋាភិបាល និងធនាគារកណ្តាលម៉ាឡេស៊ី បន្តតាមដានបំណុលគ្រួសារ សមត្ថភាពសងប្រាក់វិញ និងលក្ខខណ្ឌសេដ្ឋកិច្ចទូលំទូលាយ ដើម្បីធានាថាគ្រួសារអាចទប់ទល់នឹងផលប៉ះពាល់ខាងក្រៅដែលអាចកើតមាន។
នាយករដ្ឋមន្ត្រីរូបនេះ បានបន្ថែមថា អត្រាកម្ចីគ្រួសារដែលមានបញ្ហានៅតែមានស្ថិរភាព និងកម្រិតទាប ពោលគឺនៅត្រឹម ១% នៅចុងខែធ្នូ ឆ្នាំ២០២៥ បើធៀបនឹង ១,១% ក្នុងខែមិថុនា ឆ្នាំ២០២៥។ ហើយចំពោះការកើនឡើងនៃបំណុលគ្រួសារថ្មីៗនេះ ត្រូវបានជំរុញដោយមានការខ្ចីប្រាក់ច្រើនហួសហេតុពេក ប៉ុន្តែគ្រួសារទាំងនោះនៅតែមានសមត្ថភាពក្នុងការសងត្រលប់ទៅវិញបាន៕
