ក្រុមហ៊ុនអវកាស SpaceX របស់មហាសេដ្ឋីមានដាច់គេលើពិភពលោក លោក Elon Musk បានរកប្រាក់ចំណូលជិត ៨ពាន់លានដុល្លារនៅត្រីមាសចុងក្រោយ ប៉ុន្តែនៅតែមិនអាចទទួលបានប្រាក់ចំណេញនោះឡើយ។ នេះបើតាមការចុះផ្សាយពីសារព័ត៌មាន CNBC។
នៅថ្ងៃទី៤ ខែសីហា ក្រុមហ៊ុន SpaceX បានចេញផ្សាយរបាយការណ៍ហិរញ្ញវត្ថុត្រីមាសទីពីររបស់ខ្លួន។ នេះគឺជារបាយការណ៍ប្រាក់ចំណូលដំបូងបំផុតរបស់ក្រុមហ៊ុន ពោលគឺចាប់តាំងពីមានការបោះផ្សាយលក់ IPO ជាលើកដំបូងរបស់ខ្លួន នៅពាក់កណ្តាលខែមិថុនាមក។
ក្នុងរបាយការណ៍នោះ ប្រាក់ចំណូលត្រីមាសទីពីររបស់ក្រុមហ៊ុនបានឈានដល់ ៧,៨១ពាន់លានដុល្លារ ដែលស្ទើរតែទ្វេដងនៃរយៈពេលដូចគ្នាកាលពីឆ្នាំមុន។ តួលេខនេះក៏ខ្ពស់ជាងការព្យាករចំនួន ៦,៩ពាន់លានដុល្លារដោយក្រុមហ៊ុនទិន្នន័យហិរញ្ញវត្ថុ LSEG ផងដែរ។
ប៉ុន្តែទោះជាយ៉ាងណាក៏ដោយ ភាគហ៊ុន SpaceX បានធ្លាក់ចុះ ៨% នៅក្នុងការជួញដូរចុងក្រោយ ដោយសារតែការកើនឡើងនៃការចំណាយមូលធន។ តួលេខនេះបានឈានដល់ជាង ១៨ពាន់លានដុល្លារ ឬជិតប្រាំមួយដងនៃការចំណាយសរុបចំនួន ២,៨ពាន់លានដុល្លារក្នុងរយៈពេលដូចគ្នាកាលពីឆ្នាំមុន។
ជារួមកាលពីឆ្នាំមុន SpaceX បានខាតបង់ទឹកប្រាក់សរុបជិត ៥ពាន់លានដុល្លារ ដែលភាគច្រើនដោយសារតែការវិនិយោគយ៉ាងច្រើនលើសលប់ពេកលើហេដ្ឋារចនាសម្ព័ន្ធ AI។ ហើយកាលពីដើមឆ្នាំនេះ ក្រុមហ៊ុនបានក៏រួមបញ្ចូលគ្នាជាមួយ xAI ដែលជារបស់មហាសេដ្ឋី Elon Musk ផងដែរ។ នៅពេលនោះ ក្រុមហ៊ុនបានបញ្ជាក់ថា ចក្ខុវិស័យរបស់ខ្លួនគឺដើម្បីសាងសង់មជ្ឈមណ្ឌលទិន្នន័យនៅក្នុងលំហ៕
