សហរដ្ឋអាមេរិក បានបង្កើនរង្វាន់ប្រាក់រង្វាន់ដល់ ២៥លានដុល្លារសម្រាប់ការចាប់ខ្លួន Valencia Gonzalez ដែលទើបតែក្លាយជាមេដឹកនាំក្រុមជួញដូរគ្រឿងញៀន CJNG ដ៏ល្បីល្បាញនៅម៉ិកស៊ិក។ នេះបើតាមការចុះផ្សាយពីសារព័ត៌មាន AP។
ក្រសួងការបរទេសសហរដ្ឋអាមេរិក បានប្រកាសនៅថ្ងៃទី៥ ខែសីហាថា រង្វាន់សម្រាប់ការផ្តល់ព័ត៌មានដែលនាំឲ្យឈានដល់ការចាប់ខ្លួន ឬការចោទប្រកាន់ ទៅលើ Juan Carlos Valencia Gonzalez ដែលជាមេដឹកនាំថ្មីរបស់ក្រុមជួញដូរគ្រឿងញៀន Jalisco New Generation (CJNG) ត្រូវបានដំឡើងពី ៥លានដុល្លារដល់ ២៥លានដុល្លារ។
រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ កាលពីពេលកន្លងទៅ ក៏បានដាក់កម្រិតទិដ្ឋាការលើបុគ្គលចំនួន ៦៥ នាក់ដែលជាសមាជិកគ្រួសារ ឬសហការីជិតស្និទ្ធរបស់សមាជិកក្រុម CJNG ផងដែរ។ ក្នុងចំណោមនោះ ២៦ នាក់ត្រូវបានលុបចោលទិដ្ឋាការរបស់ពួកគេ។
យ៉ាងណាមិញ រដ្ឋមន្ត្រីការបរទេស លោក Marco Rubio បាននិយាយថា តម្លៃសរុបនៃរង្វាន់សម្រាប់ការផ្តល់ព័ត៌មានដែលនាំឱ្យមានការចាប់ខ្លួន ឬកាត់ទោសសមាជិកជាន់ខ្ពស់ CJNG ចំនួនប្រាំបីនាក់ និងបក្ខពួករបស់ពួកគេបានឈានដល់ ១០០លានដុល្លារ។
លោក Todd Blanche អគ្គរដ្ឋអាជ្ញាស្តីទី បានមានប្រសាសន៍ថា វិធានការថ្មីៗ រួមជាមួយនឹងការចោទប្រកាន់ដែលបានប្រកាសថ្មីៗនេះប្រឆាំងនឹងសមាជិកជាន់ខ្ពស់ចំនួនប្រាំនាក់នៃក្រុម CJNG មានគោលបំណងធ្វើឱ្យចុះខ្សោយភាពជាអ្នកដឹកនាំរបស់ក្រុមជួញដូរគ្រឿងញៀនដ៏ល្បីល្បាញនេះ។
គួរជម្រាបជូនថា CJNG គឺជាក្រុមឧក្រិដ្ឋជនម៉ិកស៊ិកមួយក្នុងចំណោមក្រុមឧក្រិដ្ឋជនម៉ិកស៊ិកចំនួនប្រាំបី ដែលទីក្រុងវ៉ាស៊ីនតោនបានកំណត់ថាជាអង្គការភេរវកម្មបរទេស។ អង្គការនេះបានរងការខាតបង់យ៉ាងច្រើននៅក្នុងខែកុម្ភៈ បន្ទាប់ពីមេដឹកនាំរបស់ខ្លួន គឺលោក Nemesio Ruben Oseguera Cervantes ដែលមានឈ្មោះហៅក្រៅថា “El Mencho” ត្រូវបានសម្លាប់ដោយយោធាម៉ិកស៊ិកក្នុងអំឡុងពេលបង្ក្រាប៕
