ប្រធានាធិបតីអាមេរិក លោក ដូណាល់ ត្រាំ បានប្រកាសថា រុស្ស៊ីនឹងមិនវាយប្រហារលើដែនដីរបស់អង្គការ NATO នោះឡើយ បន្ទាប់ពីមានព័ត៌មានថាទីក្រុងវ៉ាស៊ីនតោនបានធ្វើព្រមានទីក្រុងម៉ូស្គូអំពីចេតនាទាំងនេះ។ នេះបើតាមការចុះផ្សាយពីសារព័ត៌មាន AFP។
លោក ត្រាំ បាននិយាយប្រាប់ទៅកាន់អ្នកសារព័ត៌មាននៅសេតវិមានកាលពីថ្ងៃទី២៧ ខែសីហា ដោយលើកឡើងពីទំនាក់ទំនងជាមួយប្រធានាធិបតី លោក វ៉្លាឌីមៀ ពូទីនថា ៖” ខ្ញុំមានកិច្ចសន្ទនាល្អៗជាមួយគាត់។ ហើយរុស្ស៊ីនឹងមិនវាយប្រហារលើដែនដីរបស់ NATO នោះឡើយ”។
គួរឲ្យដឹងថាកិច្ចសន្ទនាតាមទូរស័ព្ទជាសាធារណៈចុងក្រោយបង្អស់រវាងមេដឹកនាំអាមេរិក និងរុស្ស៊ី បានប្រព្រឹត្តទៅកាលពីខែមិថុនា។ ចំណែកការជួបគ្នាផ្ទាល់លើកចុងក្រោយរវាងប្រធានាធិបតីទាំងពីរ គឺនៅក្នុងកិច្ចប្រជុំកំពូលនៅរដ្ឋ Alaska កាលពីខែសីហា ឆ្នាំ២០២៥។
យ៉ាងណាមិញ យោងតាមកាសែត Wall Street Journal និង CBS News កាលពីពេលមុននេះ បានរាយការណ៍ថា លោក John Ratcliffe នាយកទីភ្នាក់ងារស៊ើបការណ៍សម្ងាត់កណ្តាលអាមេរិក (CIA) បានធ្វើដំណើរទៅកាន់ទីក្រុងម៉ូស្គូដោយមិនបានប្រកាសមុន កាលពីថ្ងៃទី២៥ សីហា ដើម្បីបញ្ចុះបញ្ចូលរុស្ស៊ីកុំឱ្យវាយប្រហារលើ NATO បន្ទាប់ពីការវាយតម្លៃរបស់ស៊ើបការណ៍អាមេរិកបង្ហាញថា រុស្ស៊ីអាចនឹងប្រឈមមុខជាមួយ NATO ក្នុងរយៈពេលប៉ុន្មានឆ្នាំខាងមុខ។
ប៉ុន្តែទោះជាយ៉ាងណាក៏ដោយ លោក ត្រាំ បានឆ្លើយតបជុំវិញបញ្ហានេះវិញថា ៖”ខ្ញុំមិនចង់ធ្វើអត្ថាធិប្បាយលើរឿងនេះនោះទេ ប៉ុន្តែខ្ញុំប្រាកដចិត្តថារុស្ស៊ីនឹងមិនវាយប្រហារ NATO ឡើយ”។
មិនតែប៉ុណ្ណោះ មេដឹកនាំអាមេរិករូបនេះ ក៏បានឱ្យដឹងកាលពីថ្ងៃទី២៦ សីហាថា ដំណើរទស្សនកិច្ចរបស់នាយក CIA មានលក្ខណៈពាក់កណ្តាលផ្លូវការ ឬ (semi-routine) ដោយបញ្ជាក់ថា សកម្មភាពនេះគ្រាន់តែជាផ្នែកមួយនៃកិច្ចខិតខំប្រឹងប្រែងដើម្បីបព្ចាប់ជម្លោះនៅអ៊ុយក្រែនប៉ុណ្ណោះ៕
