មហាសេដ្ឋីមានបំផុតរបស់ប្រទេសឥណ្ឌូណេស៊ី លោក Low Tuck Kwong និងកូនស្រីរបស់លោក គឺអ្នកនាង Elaine Low បានឈានដល់ការចុះកិច្ចព្រមព្រៀងជាលក្ខខណ្ឌមួយ ដើម្បីលក់ភាគហ៊ុន ៣០% នៅក្នុង Bayan Resources ដែលជាក្រុមហ៊ុនរ៉ែធ្យូងថ្មដ៏ធំបំផុតនៅក្នុងប្រទេស។
យោងតាមការចុះផ្សាយពី Forbes បានបង្ហាញឲ្យដឹងថា អ្នកទិញយកភាគហ៊ុននេះ ត្រូវបានគេរំពឹងថាជាម្ចាស់ក្រុមហ៊ុន Jhonlin Group លោក Andi Syamsuddin Arsyad ដែលត្រូវបានគេស្គាល់ជាទូទៅថា Haji Isam។
លោក Haji Isam កំពុងទិញប្រហែលពាក់កណ្តាលនៃភាគហ៊ុនចំនួន ៦២% របស់លោក Low នៅក្នុងក្រុមហ៊ុន Bayan ខណៈពេលដែលក្រុមហ៊ុនរ៉ែធ្យូងថ្មដែលចុះបញ្ជីនៅទីផ្សារហ៊ុនហ្សាកាតាមួយនេះ បាននិងកំពុងប្រកាសរៀបចំកែសម្រួលអាជីវកម្មរបស់ខ្លួនឡើងវិញ។
គួរឲ្យដឹងថាក្រុមហ៊ុន Bayan ដែលប្រតិបត្តិការនៅក្នុងអណ្តូងរ៉ែធ្យូងថ្មធំជាងគេក្នុងប្រទេស Tabang/Pakar មិនបានបង្ហាញព័ត៌មានលម្អិតអំពីតម្លៃនៃការទិញយក ឬកាលបរិច្ឆេទកំណត់បញ្ចប់ប្រតិបត្តិការនេះនៅឡើយទេ។
ប៉ុន្តែទោះជាយ៉ាងណា យោងតាមសេចក្តីរាយការណ៍មួយបង្ហាញថា លោក Haji Isam បានផ្ដល់សំណើទិញភាគហ៊ុនគ្រប់គ្រងទាំងមូលរបស់លោក Low នៅក្នុងក្រុមហ៊ុន Bayan ក្នុងតម្លៃ ៣ពាន់លានដុល្លារ។
យោងតាមកាសែត The Business Times លោក Haji Isam ដែលត្រូវបានគេស្គាល់ថាជាសម្ព័ន្ធមិត្តដ៏ជិតស្និទ្ធរបស់ប្រធានាធិបតីឥណ្ឌូណេស៊ី លោក Prabowo Subianto បាននិងកំពុងស្វែងរកការគ្រប់គ្រងលើក្រុមហ៊ុន Bayan នៅក្នុងកិច្ចព្រមព្រៀងមួយដែលនឹងធ្វើឱ្យលោកក្លាយជាអ្នកផលិតធ្យូងថ្មកំពូលមួយរូបក្នុងពិភពលោក៕
