មហាសេដ្ឋីមានដាច់គេរបស់ពិភពលោក Elon Musk បានប្រកាសថា ក្រុមហ៊ុនខ្នាតយក្ស Tesla និង SpaceX បានបង្កើតគណៈកម្មាធិការពិសេសមួយ ដើម្បីពិភក្សាអំពីសក្តានុពលនៃការច្របាច់បញ្ចូលគ្នា ស្របតាមសំណើរបស់ម្ចាស់ភាគហ៊ុន។ នេះបើតាមការចុះផ្សាយពីសារព័ត៌មាន Reuters។
កាលពីថ្ងៃទី២០ ខែតុលា ក្រុមហ៊ុន SpaceX ដែលជាក្រុមហ៊ុនអវកាស និងបញ្ញាសប្បនិម្មិត (AI) របស់មហាសេដ្ឋី Elon Musk បានប្រកាសលទ្ធផលអាជីវកម្មត្រីមាសទី ៣ របស់ខ្លួន។ យោងតាមរបាយការណ៍នោះ ក្រុមហ៊ុន SpaceX សម្រេចបានប្រាក់ចំណូលរហូតដល់ ១៤,៥ពាន់លានដុល្លារ ដែលលើសពីការព្យាកររបស់អ្នកវិភាគ ចំនួន ១២,៧ពាន់លានដុល្លារ។
ក្នុងអំឡុងពេលប្រកាសនោះ លោក Musk ក៏បានបញ្ជាក់ផងដែរថា ក្រុមប្រឹក្សាភិបាលនៃក្រុមហ៊ុនទាំងពីរបានបង្កើតគណៈកម្មាធិការឯករាជ្យដើម្បីពិភាក្សាអំពីលទ្ធភាពនៃការច្របាច់បញ្ចូលគ្នា រវាង SpaceX និង Tesla ទៅជាក្រុមហ៊ុនតែមួយ។ លោកបានសង្កត់ធ្ងន់ថា គណៈកម្មាធិការទាំងនេះផ្សំឡើងដោយសមាជិកឯករាជ្យ ហើយរូបលោកផ្ទាល់មិនបានចូលរួមក្នុងកិច្ចពិភាក្សាទាំងនោះឡើយ ដោយសារតែបញ្ហាជម្លោះផលប្រយោជន៍។
លើសពីនេះ លោក Musk បានលើកឡើងថា៖ “ខ្ញុំគិតថាការច្របាច់បញ្ចូលគ្នានេះនឹងនាំមកនូវតម្លៃយ៉ាងច្រើន ព្រោះយើងស្ទើរតែឈានចូលដល់យុគសម័យនៃបញ្ញាសប្បនិម្មិតកម្រិតខ្ពស់ (Superintelligence) ហើយ”។
គួរជម្រាបជូនថា កន្លងមក ក្រុមហ៊ុនរបស់លោក Musk ធ្លាប់បានសហការគ្នាក្នុងគម្រោងជាច្រើន និងថែមទាំងបានប្រើប្រាស់បុគ្គលិករួមគ្នាទៀតផង។ វិនិយោគិន និងអ្នកវិភាគបានព្យាករជាយូរមកហើយអំពីលទ្ធភាពនៃការច្របាច់បញ្ចូលគ្នារវាង Tesla និង SpaceX ដែលប្រធានបទនេះត្រូវបានលើកឡើងញឹកញាប់ នៅពេលដែល SpaceX រៀបចំការបោះផ្សាយភាគហ៊ុនជាសាធារណៈលើកដំបូង (IPO) កាលពីខែមិថុនាមកម្លេះ៕
